"ინდიგოს" ჟურნალისტი საბა სორდია თბილისის საქალაქო სასამართლოს დარბაზიდან გაათავისუფლეს. მის საქმეზე გადაწყვეტილება 17 აპრილს გამოცხადდება.
საბა სორდია 6 აპრილს მარჯანიშვილის მეტროს მიმდებარე ტერიტორიაზე დააკავეს. პოლიცია მას საქართველოს ადმინისტრაციულ სამართალდარღვევათა კოდექსის 173-ე მუხლით გათვალისწინებულ სამართალდარღვევას ედავება, რაც პოლიციის კანონიერი მოთხოვნისადმი დაუმორჩილებლობას გულისხმობს.
სხდომაზე სიტყვით ისარგებლა საბა სორდიამ. როგორც ჟურნალისტმა განაცხადა მისთვის შსს-ს თანამშრომლებს არ განუმარტავთ, რომელი დეპარტამენტის თანამშრომლები იყვნენ
"ბასრი ნივთი არასოდეს მიტარებია და არც კრიმინალური სიმპათიები მქონია ოდესმე. არ განუმარტავთ შსს-ს რომელი დეპარტამენტის თანამშრომლები იყვნენ, არც მათი სახელები და გვარები უთქვამთ. შემდეგ, როცა უკვე განყოფილებაში გადამიყვანეს და დამშვიდდა სიტუაცია, გავიგე, რომ ორივე მეგრელი იყო და ხუმრობით ვუთხარი, მანამდე რატომ არ მითხარით-მეთქი. მერე შიდა, პატარა ჯიბის გახსნა დაიწყო ერთ-ერთმა პოლიციელმა და ამას მოჰყვა ჩემი წინააღმდეგობა სიტყვიერი, ვუთხარი, რომ მე თვითონ გავხსნითქო, რაზეც ხელი დამიჭირა. ასევე გოუ-პრო მქონდა ჩანთაში, კამერასაც მოკრეს თვალი და ამას ცოტა უკმაყოფილება მოჰყვა. დაკავების შემდეგ, როცა მანქანაში ჩამსვეს სიტყვიერ შეურაცხყოფას ჰქონდა ადგილი, მაგრამ ზომიერების ფარგლებში, არ შეუგინებიათ, მაგრამ პერსონალურად მაყენებდნენ შეურაცხყოფას. შემდეგ განყოფილებაში რომ ავედით ერთი ორი წუთის განმავლობაში გაგრძელდა ეს შეურაცმყოფელი ფრაზები. კამერაზე რამდენიჯერმე გავამახვილე ყურადღება, იმიტომ რომ ერთი გოუ-პრო ადრე წამართვეს აქციების დროს და სათუთი ნივთია ჩემთვის, რამდენჯერმე გავიმეორე და მითხრეს, კედელს მივანარცხებო", - თქვა საბა სორდიამ.
ფოტო: პუბლიკა
