სირიაში, ბაშარ ალ ასადის დამხობის შემდეგ, ლატაკიისა და ტარტუსის პროვინციების საპორტო ქალაქებში, ახალი ხელისუფლებისა და ასადის ლოიალისტებს შორის ყველაზე სისხლიანი დაპირისპირება მოხდა.
მხარეებს შორის შეიარაღებული დაპირისპირება 6 მარტს დაიწყო, რომელასაც დღემდე 200-ზე მეტი ადამიანი ემსხვერპლა. ინფორმაციას სირიაში ადამიანის უფლებათა ბრიტანული ობსერვატორია ავრცელებს.
მისი ცნობებით, შეტაკებები მაშინ დაიწყო, როდესაც სამთავრობო ძალებმა ზღვისპირა ქალაქ ჯაბლეში ძებნილი პირის დაკავება სცადეს და მოულოდნელად მათ ასადის ლოიალისტები დაესხნენ თავს.
6 და 7 მარტს ახალი მთავრობის მხარდამჭერი ძალები რამდენიმე ზღვისპირა სოფელს დაესხნენ თავს და 69 კაცი მოკლეს.
კომენდანტის საათი გამოცხადდა ლატაკიის პროვინციაში, რომელიც ასადის კლანის დასაყრდენად და ალავიტების საზოგადოების მნიშვნელოვანი ნაწილის საცხოვრებლად არის მიჩნეული, ასევე ტარტუსსა და ჰომსში. დამასკოსა და სხვა პროვინციებიდან დამატებითი ძალები გაიგზავნა ლატაკიასა და ტარტუსში.
