საფრანგეთის პრეზიდენტმა, ემანუელ მაკრონმა განაცხადა, რომ რამდენიმე ევროპელი ლიდერი მას უკვე დაუკავშირდა საფრანგეთის ბირთვული შეკავების სხვა ქვეყნებზე გავრცელების შეთავაზებასთან დაკავშირებით.
„რამდენიმე ჩემი კოლეგა მოვიდა ჩემთან სასაუბროდ, ასე რომ, ახლა გვექნება ფაზა, სადაც ჩვენი ტექნიკური სპეციალისტები ისაუბრებენ. გავხსნით სტრატეგიულ და ტექნიკურ დიალოგს, რომელსაც მოჰყვება მოლაპარაკებები სახელმწიფოებისა და მთავრობების მეთაურების დონეზე“, – განაცხადა მაკრონმა. ამასთან, მისივე თქმით, იმედოვნებს, რომ 2025 წლის პირველი ნახევრის ბოლომდე ახალი თანამშრომლობები ჩამოყალიბდება.
ამასთან, ემანუელ მაკრონმა უპასუხა კრემლის კრიტიკას, რომელმაც მას მოუწოდა, რომ არ დაემუქროს ბირთვული რიტორიკით და პარალელები გაავლო ნაპოლეონის მიერ რუსეთის დაპყრობის წარუმატებელ მცდელობასთან.
"მე კარგად ვიცნობ პრეზიდენტ პუტინს, ასე რომ, თუ ის ასე რეაგირებს, ესე იგი მან იცის, რომ მე სიმართლე ვთქვი. ვიცი, რომ მას შეუძლია უღალატოს შეთანხმებებს, რომლებსაც ხელს აწერს, რადგან მას ეს უკვე გაუკეთებია. ის ისტორიულ შეცდომას უშვებს: ნაპოლეონი დაპყრობით ომებს აწარმოებდა. დღეს კი ერთადერთი იმპერიალისტური ძალა, რომელსაც ახლა ევროპაში ვხედავ, რუსეთია". - თქვა მაკრონმა.
საფრანგეთის პრეზიდენტის თქმით, ის მზად არის, ესაუბროს ვლადიმერ პუტინს მაშინ, როდესაც უკრაინის პრეზიდენტი და ევროპელი პარტნიორები ჩათვლიან, რომ სწორი დრო იქნება.
შეგახსენებთ, ემანუელ მაკრონმა განაცხადა, რომ ევროპის ქვეყნების დასაცავად აუცილებელია დისკუსიები გაიმართოს ბირთვული იარაღის გამოყენების შესახებ. ამის ამის შესახებ მანკრონმა 5 მარტს ერისადმი მიმართვისას განაცხადა.
