იტალიის პრემიერ-მინისტრი, ჯორჯია მელონი დიდი ბრიტანეთის პრემიერ-მინისტრ კირ სტრამერს ლონდონში თავდაცვის სამიტამდე შეხვდა. მელონის თქმით, გაერთიანებულ სამეფოსა და იტალიას შეუძლიათ, საკვანძო როლი შეასრულონ ხიდების აგებაში.
„ვფიქრობ, ძალიან, ძალიან მნიშვნელოვანია, რომ თავიდან ავიცილოთ დასავლეთის დაყოფის რისკი. ვფიქრობ, გაერთიანებულ სამეფოსა და იტალიას შეუძლიათ, საკვანძო როლი შეასრულონ ხიდების აგებაში,“ - განაცხადა იტალიის პრემიერ-მინისტრმა.
მან დასძინა, რომ თუ დასავლეთი გაიყოფა, ეს "ყველას დაასუსტებს".
თავდაცვის სამიტზე დასასწრებად ლონდონში სხვადასხვა ქვეყნის ლიდერები იკრიბებიან.
სამიტში, რომელზეც უკრაინის საკითხი განიხილება, მონაწილეობას მიიღებენ ევროპელი ლიდერები, უკრაინის პრეზიდენტი ვოლოდიმირ ზელენსკი, ასევე კანადის პრემიერ-მინისტრი ჯასტინ ტრუდო, ევროკომისიის პრეზიდენტი ურსულა ფონ დერ ლაიენი და ევროპული საბჭოს პრეზიდენტი ანტონიუ კოშტა.
ამასთან, ლონდონში ელოდებიან თურქეთის საგარეო საქმეთა მინისტრს, ჰაკან ფიდანს.
ევროპული ქვეყნების წარმომადგენლებიდან სამიტში მონაწილეობას მიიღებენ საფრანგეთის პრეზიდენტი ემანუელ მაკრონი, გერმანიის კანცლერი ოლაფ შოლცი, ასევე დანიის, ნიდერლანდების, ნორვეგიის, პოლონეთის, ესპანეთის, ფინეთის, შვედეთის, ჩეხეთისა და რუმინეთის ლიდერები.
