უკრაინის პრეზიდენტმა ვოლოდიმირ ზელენსკიმ განაცხადა, რომ ვაშინგტონში პრეზიდენტ დონალდ ტრამპთან შესახვედრად მიწვევა მიიღო მას შემდეგ, რაც მოლაპარაკების მხარეები აშშ-უკრაინას შორის მინერალებზე გარიგების განახლებულ ვერსიაზე შეთანხმდნენ.
ვაშინგტონში უკრაინის პრეზიდენტის ვიზიტის თარიღი ჯერ დადგენილი არ არის, თუმცა 28 თებერვალთან დაკავშირებით არის „სამუშაო“ ვარიანტი, რომელიც აშშ-ის პრეზიდენტმა დონალდ ტრამპმა გააჟღერა.
ზელენსკიმ განაცხადა, რომ დონალდ ტრამპთან შეხვედრის თარიღი და ფორმატი ჯერ დადგენილი არ არის.
"დიახ, არის სამუშაო თარიღი, რაც აშშ-ის პრეზიდენტმა თქვა - პარასკევი. ოფისები კავშირში არიან", - განაცხადა ვოლოდიმირ ზელენსკიმ.
მანამდე აშშ-ის პრეზიდენტმა დონალდ ტრამპმა განაცხადა, რომ წიაღისეულის შესახებ შეთანხმება „თითქმის“ მზად არის და ზელენსკი ვაშინგტონში 28 თებერვალს ჩავა.
