რუსეთის ხელისუფლება შესაძლოა დათანხმდეს დასავლეთის მიერ გაყინული 300 მილიარდი დოლარის სახელმწიფო აქტივების გამოყენებას უკრაინის აღსადგენად, როგორც კონფლიქტის დასრულების შეთანხმების ნაწილი. იტყობინება Reuters-ი ინფორმირებულ წყაროებზე დაყრდნობით.
გავრცელებული ცნობით, კრემლმა შესაძლოა, თანხის ორი მესამედი, დაახლოებით 200 მილიარდი დოლარი დათმოს უკრაინაში ომისაგან განადგურებული ტერიტორიების აღსადგენად. ამავე დროს, მოსკოვი დაჟინებით მოითხოვს, რომ დარჩენილი თანხა, დაახლოებით 100 მილიარდი გამოიყოს მის მიერ ოკუპირებული უკრაინის ტერიტორიების აღდგენისთვის.
Reuters-ის სხვა წყაროს ცნობით, გაყინულ აქტივებთან დაკავშირებით მოლაპარაკებები ნამდვილად მიმდინარეობს, თუმცა პროპორციები, თუ როგორ განაწილდება იგი ჯერ არ არის დადგენილი. ამასთან, მოსკოვი ითხოვს მოხსენებას იმ სახსრების შესახებ, რომელიც უკრაინის აღდგენას მოხმარდება.
წყაროები აცხადებენ, რომ მნიშვნელოვანია, თუ რომელი კომპანიები მიიღებენ კონტრაქტებს ომისშემდგომი რეკონსტრუქციისთვის, რომლის ღირებულებაც მსოფლიო ბანკის შეფასებით დაახლოებით ნახევარი ტრილიონი დოლარია.
შეგახსენებთ, რუსეთის უკრაინაში შეჭრის შემდეგ, დასავლეთმა სანქციები დააწესა რუსეთის ცენტრალური ბანკისა და ეროვნული კეთილდღეობის ფონდის წინააღმდეგ და გაყინა ყველა აქტივი, რომელიც "დიდი შვიდეულის" ქვეყნებში იყო მოთავსებული.
რუსეთის ცენტრალური ბანკის მონაცემებით, 2022 წლის დასაწყისში მას ოქროსა და სავალუტო რეზერვებში განთავსებული ჰქონდა 207 მილიარდი ევროში, 67 მილიარდი დოლარში, 37 მილიარდი ბრიტანულ ფუნტში და 64 მილიარდი სხვა ვალუტებში, მათ შორის იაპონურ იენში, კანადურ და ავსტრალიურ დოლარში.
თავდაპირველად, მიმდინარეობდა დისკუსიები, რუსეთისთვის ამ აქტივების სრულად ჩამორთმევისა და უკრაინისთვის გადაცემის შესახებ, რომელიც უშედეგოდ დასრულდა. ამის წინააღმდეგ გამოვიდნენ გერმანია, საფრანგეთი და ასევე ევროპის ცენტრალური ბანკი, რომელიც მიიჩნევდა, რომ ეს საფრთხე შეუქმნიდა ევროს, როგორც გლობალურ ვალუტას.
