მიუნხენის კონფერენციაზე "ქართული ოცნების" არყოფნა გამოხატავს იმას, რომ ივანიშვილის ხელისუფლებას ლეგიტიმაციას არავინ აძლევს, - ამის შესახებ პარტია "გახარია საქართველოსთვის" ერთ-ერთმა ლიდერმა, ბექა ლილუაშვილმა განაცხადა.
მისი თქმით, "მიუხედავად "ოცნების" უვარგისობისა", უსაფრთხოების კონფერენციაზე ქართველი ხალხის ინტერესები, საქართველოში გრძელვადიანი მშვიდობის თაობაზე, დაცული იქნება.
"ქართული ოცნების" არცერთი წარმომადგენელი ამ კონფერენციაზე არ არის, რაც კიდევ ერთხელ გამოხატავს იმას, რომ არავინ, მათ შორის, უსაფრთხოების ეკოსისტემიდან, "ოცნების" ხელისუფლებას ლეგიტიმაციას არ აძლევს. ეს ცალსახად მიუთითებს იმაზე, რომ მიუხედავად "ოცნების" უვარგისობისა, ქართველი ხალხის ინტერესები, როგორც ხელახალი არჩევნების დანიშვნის, ასევე რეგიონში უსაფრთხოების უზრუნველყოფის და საქართველოში გრძელვადიანი მშვიდობის თვალსაზრისით, დაცული იქნება უსაფრთხოების კონფერენციაზე", - განაცხადა ბექა ლილუაშვილმა.
დღეს გერმანიაში მიუნხენის უსაფრთხოების კონფერენცია იხსნება. სამდღიან კონფერენციაზე დაგეგმილია მსოფლიოს 60-მდე ლიდერის შეკრება.
ყოველწლიურ საერთაშორისო ღონისძიებაში ასევე მონაწილეობენ ევროკავშირის ლიდერები.
კონფერენციას გერმანიის პრეზიდენტი ფრანკ-ვალტერ შტაინმაიერი გახსნის. ღონისძიების ფარგლებში გაიმართება მაღალი დონის დისკუსიები საგარეო და უსაფრთხოების გამოწვევებთან დაკავშირებით.
საქართველოდან კონფერენციას მე-5 პრეზიდენტი სალომე ზურაბიშვილი და პარტია “საქართველოსთვის“ ლიდერი, გიორგი გახარია დაესწრებიან. კონფერენციაზე საქართველოს ხელისუფლების წარმომადგენლები არ მიუწვევიათ.
