მოსამართლე მანუჩარ ცაცუამ 19 წლის ლუკა ღვინიაშვილს ერთკვირიანი პატიმრობა შეუფარდა.
ფოტოგრაფი ღვინიაშვილი გუშინ დააკავეს. ადვოკატის თქმით, ლუკას სამოქალაქო ფორმაში ჩაცმული ადამიანები აედევნენ, რომლებსაც არ ჰქონდათ რაიმე მაიდენტიფიცერებლი საბუთი.
„შემთხვევის დროს არანაირი მაიდენტიფიცირებელი ნიშანი არ ჰქონდათ, რომ ისინი იყვნენ პოლიციის თანამშრომლები – არც მანქანა, არც უნიფორმა, არაფერი. არ უთხრეს, რომ იყვნენ პოლიციის თანამშრომლები და გაეკიდნენ ლუკას. მაშინ, როდესაც წინა დღეებში ვნახეთ მედიასაშუალებებში, რომ სამოქალაქო პირები დევნიდნენ და სცემდნენ ადამიანებს, ლუკას შეეშინდა და გაიქცა, მივიდა საპატრულო პოლიციის მანქანასთან და პოლიციელებს სთხოვდა, მიშველეთო”,- თქვა “ადამიანის უფლებათა ცენტრის“ წარმომადგენელმა, ეკა ქობესაშვილმა.
ადვოკატი ლუკა ღვინიაშვილისთვის ადმინისტრაციული პატიმრობის შეფარდებას დაუსაბუთებელს უწოდებს. ის მოსამართლის ამ გადაწყვეტილებას ღვინიაშვილის საქმიანობას უკავშირებს.
“მისი დაკავების მიზეზი იყო მისი ჟურნალისტური საქმიანობა. ლუკა არის ფოტოგრაფი, ის თანამშრომლობს სხვადასხვა მედიასაშუალებებთან. ამ ეტაპზე მას კონტრაქტი აქვს გაფორმებული ერთ-ერთ უცხოურ მედიასაშუალებასთან და აწვდის მას აქციაზე გადაღებულ ფოტო-ვიდეომასალას. ამიტომ მოხდა მისი თვალთვალი და ადევნება. როგორც ირკვევა, მას რამდენიმე დღის განმავლობაში დასდევდნენ. შინაგან საქმეთა სამინისტრო დაინტერესებულია იმით, რომ მკაცრი და უკანონო პოლიტიკა გაატაროს მათ მიმართ, თუ ვინმე გააშუქებს აქციას, გამოავლენს რაიმე სახის სამართალდარღვევას პოლიციის მხრიდან, ზოგადად, თუ ვინმე დისკომფორტს შეუქმნით”, – ამბობს კობესაშვილი.
