ისრაელის თავდაცვის ძალებში განაცხადეს, რომ გასული 48 საათის განმავლობაში, სირიის სტრატეგიული იარაღის მარაგის უმეტესი ნაწილი განადგურებულია. მათივე განცხადებით, ამით აღკვეთეს იარაღის გამოყენება ტერორისტული ელემენტების მიერ.

კერძოდ, ისრაელის თავდაცვის ძალები (IDF) იუწყება, რომ გასულ ღამეს ისრაელის საზღვაო ძალების სარაკეტო ხომალდებმა ერთდროულად შეუტიეს სირიის საზღვაო ძალების ორ ობიექტს: ალ-ბაიდას პორტს და ლატაკიის პორტს, სადაც სირიის საზღვაო ძალების 15 ხომალდი იყო განლაგებული.

ისრაელის არმიის ცნობით, განადგურდა ათობით ზღვა-ზღვა კლასის რაკეტა, რომელთა ფრენის დიაპაზონი 80-190 კილომეტრია. თითოეული რაკეტა ატარებდა მნიშვნელოვან ასაფეთქებელ ტვირთს, რაც საფრთხეს უქმნიდა სამოქალაქო და სამხედრო გემებს რეგიონში.

გარდა ამისა, ისრაელის სამხედროების ცნობით, განხორციელდა 350-ზე მეტი საჰაერო დარტყმა.

შესაბამისად, IDF-მა დაასახელა დარტყმის სამიზნეების დიდი სპექტრი, მათ შორის საზენიტო ბატარეები, სირიის საჰაერო ძალების აეროდრომები და ათობით იარაღის წარმოების ობიექტი დამასკოში, ჰომსში, ტარტუსში, ლატაკიასა და პალმირაში.

IDF ასევე იტყობინება სახმელეთო ოპერაციების შესახებ.

„ჩრდილოეთის სარდლობის ცეცხლის მართვის ცენტრმა განახორციელა საჰაერო დარტყმები სირიაში 130 სამიზნეზე, მათ შორის იარაღის საცავებზე, სამხედრო ობიექტებზე, გამშვებებზე და საცეცხლე პოზიციებზე“, - აღნიშულია IDF-ის ინფორმაციაში.

როგორც ცნობილია, ისრაელელი სამხედროები სირიის ტერიტორიის სიღრმეში შევიდნენ, ისრაელის ტანკები კი სირიის დედაქალაქ დამასკოდან 25 კილომეტრში იმყოფებიან.