შეერთებულმა შტატებმა სანქციები დაუწესა 10-ზე მეტი ქვეყნის 400-მდე ფიზიკურ და იურიდიულ პირს, რომლებიც რუსეთს დასავლეთის მიერ დაწესებული სანქციების გვერდის ავლაში ეხმარებოდნენ.
სანქციების ქვეშ მოექცა ათეულობით კომპანია რუსეთიდან, არაბთა გაერთიანებული საამიორებიდან, თურქეთიდან, ტაილანდიდან, მალაიზიიდან, შვეიცარიიდან, ჩინეთიდან, ინდოეთიდან და ჰონკონგიდან.
სანქციები ერთობლივად დააწესეს აშშ-ის სახელმწიფო დეპარტამენტმა, სახაზინო დეპარტამენტმა და სავაჭრო დეპარტამენტმა.
სახაზინო დეპარტამენტმა სანქციები დაუწესა 274 პირს, სახელმწიფო დეპარტამენტმა 120-ზე მეტს, ხოლო სავაჭრო დეპარტამენტმა 40 კომპანიასა და კვლევით ინსტიტუტს.
"აშშ და ჩვენი მოკავშირეები გააგრძელებენ გადამწყვეტ მოქმედებებს მთელს მსოფლიოში, რათა შეაჩერონ კრიტიკულად მნიშვნელოვანი ტექნოლოგიების ნაკადი, რომელიც რუსეთს სჭირდება უკანონო და ამორალური ომის საწარმოებლად უკრაინის წინააღმდეგ", - განაცხადა სახაზინო მდივნის მოადგილემ, უოლი ადეიმომ.
