ევროპასთან ინტეგრაციის საპარლამენტო კომიტეტის თავმჯდომარე დავით დარჩიაშვილი არ გამორიცხავს, რომ ვლადიმერ სანაკოევი "სერიოზული შანტაჟის" მსხვერპლი გამხდარიყო.
"სანაკოევის მხრიდან ასეთი განცხადების გაკეთება არაადეკვატური ნაბიჯია. იგი შეიძლება იყოს სერიოზული შანტაჟის მსხვერპლი, როგორც რუსეთის, ისე ადგილობრივი კლანების, ან ორივეს მხრიდან", - განუცხადა დარჩიაშვილმა ჟურნალისტებს.
ამასთან, დარჩიაშვილი არც იმას გამორიცხავს, რომ "კოკოითი ფანდარასტის" ყოფილ ხელმძღვანელს სკანდალური განცხადება სოლიდური ფულადი ანაზღაურების სანაცვლოდაც გაეკეთებინოს.
"შეიძლება აქ ფულის ამბავიც იყოს", - განმარტავს საპარლამენტო უმრავლესობის წარმომადგენელი.
შეგახსენებთ, რომ მოძრაობა "კოკოითი ფანდარასტ"-ის ყოფილი ხელმძღვანელი ვლადიმერ სანაკოევი, რომელიც 2004-2008 წლებში საქართველოს მთავრობასთან დაახლოებულ პირად ითვლებოდა, სკანდალურ განცხადებას აკეთებს და აცხადებს, რომ საქართველოში რუსული "ეფ-ეს-ბეს" დავალებებს ასრულებდა.
