ხაბეიშვილმა იმდენად შეაძულა თავი თავის პარტიის წევრებს, რომ არა მხოლოდ მის გადადგომას, არამედ საერთოდ პოსტის გაუქმებას ითხოვენ, – ამის შესახებ „ქართული ოცნების“ წევრმა, ბექა ოდიშარიამ განაცხადა.
„არ ვიცი, საიდან მოგახსენოთ, თავიდან, სააკაშვილიდან, თუ ბოლოდან, ხაბეიშვილიდან, რომლის თავის მოჭრასაც აპირებს მისივე პარტიის ნახევარი. ჩვენთვის გასაგებია, რატომაც ვერ გაართვა თავი ხაბეიშვილმა და დასაწყისშივე ნათელი იყო, რომ ადამიანი, რომელსაც არანაირი უნარ-ჩვევები არ აქვს – არც კონსტრუქციული, არც რამე უშენებია, არც რამე უკეთებია, როგორ გაუძღვებოდა ე.წ. მთავარ ოპოზიციურ ძალას. იმდენად შეაძულა თავი თავისი პარტიის წევრებს, რომ არა მხოლოდ ხაბეიშვილის გადადგომას, არამედ საერთოდ პოსტის გაუქმებას ითხოვენ. უთავოდ სიარული ურჩევნიათ, ხაბეიშვილის თავით სიარულს და მე მესმის ამ პარტიის წევრების. ამას, საერთო ჯამში, დავარქმევდი შემდეგს: რასაც დასთეს, იმას მოიმკი. მთელ საქართველოს უწინასწარმეტყველებდნენ და ხატავდნენ რაღაც აპოკალიპტურ სცენარებს და თავად მიიღეს რეალური აპოკალიფსი საკუთარ პარტიაში“, – განაცხადა ოდიშარიამ.
