„ვარდების რევოლუციას“ მოყვა რეფორმების ტალღა და სწორედ ამით გახდა საქართველო ცივილიზებული სამყაროსთვის საინტერესო, მომავალი წლის 23 ნოემბერი უნდა გახდეს ახალი ცვლილებების საფუძველი - გია ხარჩილავა
ხვალ 23 ნოემბერია, გიორგობა, ვარდების რევოლუციის 20 წლისთავი და მომავალი წლის 23 ნოემბერი უნდა გახდეს ახალი ცვლილებების საფუძველი, - ამის შესახებ განაცხადა წალენჯიხის მერმა, გია ხარჩილავამ.
მისი თქმით, ვარდების რევოლუციას“ მოყვა რეფორმების ტალღა და ამ რეფორმებით საქართველო ცივილიზებული სამყაროსთვის საინტერესო გახდა.
„20 წლის წინ მიხეილ სააკაშვილის წალენჯიხიდან გაუძღვა რევოლუციურ ცვლილებებს და გიორგობას, 23 ნოემბერს ქართველმა ერმა დაამარცხა იმ პერიოდის დიოკლიტიანე - შევარდნაძის რეჟიმი. „ვარდების რევოლუციას“ მოყვა რეფორმების უპრეცედენტო ტალღა და სწორედ ამ რეფორმებით გახდა საქართველო ევროპისთვის და ცივილიზებული სამყაროსთვის საინტერესო. ამ რეფორმებს მოჰყვა ასოცირების ხელშეკრულება და არავის ბოლო 30 წლის განმავლობაში იმხელა წვლილი არ აქვს შეტანილი ევროინტეგრაციაში, როგორც მიხეილ სააკაშვილს. ვულოცავ პრეზიდენტ სააკაშვილს კანდიდატის სტატუსის მიღებას, ვულოცავ ქართველ ხალხს, ვისაც ეკუთვნის და ეს ეკუთვნის მიშას და ქართველ ხალხს. ამასთან ხაზგასმით ვამბობ, რომ ის 9 პუნქტი, რაც დაგვიდგინა ევროსაბჭომ შესასრულებლად მოლაპარაკებების დაწყებისთვის, „ქართული ოცნების“ ხელში არ შესრულდება და სტატუსის დარჩება სტატუსად, ამიტომ თუ ჩვენ რეალურად გვინდა გავიაროთ ეტაპები და გავხდეთ ევროკავშირის რეალური წევრი, კეთილდღეობით, კანონებით, თანასწორობით, ღირსეული სიბერით, ძლიერი ეკონომიკით, განათლებით, სოციალური დაცვით, სამედიცინო მომსახურებით და ყველა იმ სიკეთით, რასაც ევროკავშირი გვაძლევს, მაშინ ჩვენ უნდა შევცვალოთ ეს ხელისუფლება და შეცვალოს სწორედ იმ პოლიტიკურმა ძალამ, რომელიც ევროკავშირის სათავეებთან დგას, ეს გახლავთ „ერთიანი ნაციონალური მოძრაობა“, მიხეილ სააკაშვილი ამ მოძრაობის სათავეში და ის 9 პუნქტი სწორედ ამ გამოცდილი გუნდის ხელში გახდება რეალობა, როგორც გახდება რეალობა ევროკავშირში გაწევრიანება. ხვალ 23 ნოემბერია, ხვალ გიორგობაა, ხვალ ვარდების რევოლუციის 20 წლისთავია და მე მინდა ეს თარიღი კარგად გაიაზროს ყველა პოლიტიკურმა სპექტრმა და ამასთან მომავალი წლის 23 ნოემბერი უნდა გახდეს ახალი ცვლილებების საფუძველი, ისევ ახალი კოლონა, ისევ წალენჯიხიდან, ისევ ახალი ცვლილებები, რომელიც ძალიან სწრაფად დაგვაახლოებს ევროკავშირთან.“ - განაცხადა გია ხარჩილავამ.
