რეჯეფ თაიფ ერდოღანმა მთავრობის ახალი კაბინეტის წარადგინა. ახალ კაბინეტში საგარეო საქმეთა მინისტრის თანამდებობა ქვეყნის დაზვერვის სამსახურის ყოფილმა ხელმძღვანელმა, ჰაკან ფიდანმა დაიკავა. საგარეო საქმეთა მინისტრის თანამდებობა დატოვა მევლუთ ჩავუშოღლუმ, რომელიც პოზიციაზე 2014 წლიდან მუშაობდა.
ჰაკან ფიდანი თურქეთის დაზვერვის სამსახურს 2010 წლიდან ხელმძღვანელობდა. ყოფილი სამხედრო ჰაკან ფიდანი ფლობს დოქტორის ხარისხს საერთაშორისო ურთიერთობებში. ასევე ცნობილია, რომ თურქეთის საგარეო საქმეთა სამინისტროს მოქმედი ხელმძღვანელი უკრაინასა და რუსეთს შორის სამხედრო ტყვეების გაცვლის შესახებ მოლაპარაკებებში მონაწილეობდა და „აზოვსტალის“ დამცველების გათავისუფლებაში მნიშვნელოვანი როლი შეასრულა.
ქვეყნის თავდაცვის უწყება გენშტაბის ყოფილმა ხელმძღვანელმა, გენერალმა იასარ გულერმა ჩაიბარა, რომელმაც პორტფელი ჰულუსი აკარისგან გადაიბარა. იასარ გულერი ხელმძღვანელობდა თურქეთის სამხედრო შეჭრას სირიაში და აკონტროლებდა შემდგომ სამხედრო ოპერაციებს სირიასა და ერაყში.
ერდოღანმა ყოფილი ბანკირი, მეჰმეთ სიმსეკი ხაზინისა და ფინანსთა მინისტრად დაასახელა. მეჰემეთ სიმსეკი ფინანსთა მინისტრად 2009-2015 წლებშიც მუშაობდა.
თურქეთის ვიცე-პრეზიდენტის თანამდებობას განვითარების ყოფილი მინისტრი და ყოფილი ვიცე-პრემიერი, ჯევდეთ ილმაზი დაიკავებს. ილმაზი 2020 წლის ნოემბრიდან თურქეთის პარლამენტის დაგეგმვისა და ბიუჯეტის კომისიის თავმჯდომარეა.
