დემოკრატიის კვლევის ინსტიტუტის (DRI) ინფორმაციით, რუსული პროპაგანდა ოკუპირებულ ტერიტორიებზე პარლამენტის მიერ „უცხოური გავლენის გამჭვირვალობის შესახებ“ რუსული სულისკვეთების კანონპროექტის ჩაგდების შემდეგ გააქტიურდა.
„რუსული პროპაგანდა ოკუპირებულ ტერიტორიებზე განსაკუთრებული სიმძლავრით მას შემდეგ გააქტიურდა, რაც საყოველთაო სახალხო მღელვარების ფონზე „ქართული ოცნება“ იძულებული გახდა ჩაეგდო დამოუკიდებელი საზოგადოებრივი ორგანიზაციებისა და მედიის წინააღმდეგ მიმართული ე.წ. რუსული კანონის პროექტი.
რუსული სულისკვეთების კანონპროექტის ჩაგდება „სახელმწიფოებრივ“ საფრთხედ ჩაითვალა აფხაზეთში და ცხინვალში და გაჩნდა შიში, რომ შესაძლოა ხელისუფლების მიმართ კრიტიკულად განწყობილ ადამიანებს რუსეთთან და შესაბამისად, აფხაზეთის მოსახლეობასთან ომი სურთ. აფხაზეთის დე ფაქტო პრეზიდენტმა ასლან ბჟანიამ და დე ფაქტო საგარეო საქმეთა მინისტრმა ინალ არძიმბამ რუსეთის საგარეო საქმეთა მინისტრის სერგეი ლავროვის მსგავსი პოზიცია ღიად დააფიქსირეს. ასლან ბჟანიამ განაცხადა, რომ საბრძოლო მზადყოფნას გააძლიერებენ, რადგან, თბილისში ოპოზიცია მთავრობის დამხობასა და რუსეთის წინააღმდეგ „მეორე ფრონტის“ გახსნას ცდილობს.
DRI-ის წყაროს ინფორმაციით, 2023 წლის 10-11 მარტს აფხაზეთის დე ფაქტო ძალოვანი სტრუქტურები ყაზარმულ რეჟიმზე გადავიდნენ; გამოცხადდა რეზერვისტთა მობილიზაცია“,- ნათქვამია ინფორმაციაში.
დემოკრატიის კვლევის ინსტიტუტი მოუწოდებს საქართველოს აღმასრულებელი და საკანონმდებლო ხელისუფლების წარმომადგენლებს, გაითვალისწინონ ოკუპირებულ ტერიტორიებზე მცხოვრები ადამიანების რთული მდგომარეობა და ნუ ასაზრდოებენ რუსულ დეზინფორმაციას, რისთვისაც აუცილებელია, შეწყდეს შეკრებისა და სიტყვის თავისუფლებით მოსარგებლე ადამიანების დემონიზაცია და სამოქალაქო საზოგადოებასთან პოლარიზაციის გაღრმავება.