გერმანიის საგარეო საქმეთა მინისტრი, ანალენა ბერბოკი ელჩის რეზიდენციაში ოპოზიციის წარმომადგენლებს შეხვდა. შეხვედრაზე იმყოფებოდნენ „ლელოს“, „პარტია საქართველოსთვის“, „სტრატეგია აღმაშენებლის“ წარმომადგენლები.
როგორც „ნაციონალური მოძრაობის“ წევრმა, პეტრე ცისკარიშვილმა შეხვედრის დასრულების შემდეგ ჟურნალისტებს განუცხადა, სხვადასხვა საკითხზე ისაუბრეს, მათ შორის მიხეილ სააკაშვილისა და ნიკა გვარამიას შესახებ.
„ მკაფიოდ ვისაუბრეთ მიხეილ სააკაშვილზე, გვარამიაზე, რომ ისინი არიან პოლიტიკური პატიმრები. მიშას შემთხვევაში, მის სიცოცხლეს ემუქრება საფრთხე, ჯანმრთელობის მდგომარეობა კრიტიკულია და შეიძლება, უბრალოდ მოკვდეს. ეს ავუხსენით ქალბატონ ბერბოკს. მას ამომწურავი ინფორმაცია ჰქონდა ამ საკითხთან დაკავშირებით. ვისაუბრეთ ევროკავშირის ეგიდით პოლონელი ექიმების ჩამოსვლასთან დაკავშირებით. ასევე საქართველოს მომავალ განვითარებაზე. მაგალითად, დეპოლარიზაციაზე რომ ვსაუბრობთ, ეს ასევე უკავშირდება პოლიტპატიმრების გათავისუფლებას.
მნიშვნელოვანია, რომ ბერბოკმა პრაქტიკულად გაიგო ჩვენი ხმა – რა უნდა ქართველ ხალხს, საით მიისწრაფვის. შეხვდა სამოქალაქო საზოგადოებას, სტუდენტებს, მოგვისმინა ჩვენც. ასევე ამბობს, მარტო ხალხს ვერ მივიღებთ, მთავრობა უნდა ახორციელებდეს რეფორმებსო, მთლიანად ქვეყანა უნდა იყოს უფრო დემოკრატიული, პოლიტიკური კლიმატი აბსოლუტურად განსხვავებული იმისგან, რაც დღეს არის, მეტი დემოკრატია, ადამიანის უფლებების დაცვა, კანონის უზენაესობა, მართლმსაჯულება არ უნდა ედოს ჯიბეში ბიძინა ივანიშვილს, არ უნდა აყალბებდნენ,“– განაცხადა პეტრე ცისკარიშვილმა.
"ლელოს" ლიდერის, მამუკა ხაზარაძის თქმით, შეხვედრა იყო საქმიანი, პირდაპირი და გულახდილი. მისი თქმით, საუბრის ერთ-ერთი მთავარი თემა იყო 12 რეკომენდაცია:
„შეხვედრა იყო ძალიან საქმიანი, ძალიან პირდაპირი და გულახდილი. თქვენ იცით, რომ გერმანია არის გადამწყვეტი და სტრატეგიული პარტნიორი საქართველოსი მთელი მისი ისტორიის და განსაკუთრებით ბოლო 30 წლის განმავლობაში ისევე, როგორც საფრანგეთი. მათ საკმაოდ სერიოზული გადაწყვეტილება შეუძლიათ მიიღონ იმ ასპირაციაში, რაც არის ჩვენთვის ევროკავშირის კანდიდატობის მიღება.
ბუნებრივია, საკითხი შეეხო 12 რეკომენდაციას, რომელიც სამწუხაროდ არ სრულდება. აქ არ არის საუბარი უბრალოდ რაღაც 12 საკითხის და პუნქტის შესრულებაზე, განწყობა არ იგრძნობა იმისა, რომ მალე შესრულდება. ბუნებრივია შევეხეთ სხვა საკითხებსაც." განაცხადა ხაზარაძემ.
