ამერიკელ მსახიობს, ალეკ ბოლდუინს, ფილმის გადაღებისას ოპერატორ ჰალინა ჰატჩინსის არაგანზრახ მკვლელობისთვის ოფიციალურად ბრალი წაუყენეს. იუწყება The Associated Press
სანტა-ფეს საოლქო პროკურორმა მერი კარმაკ-ალთვისმა ანალოგიური ბრალი წაუყენა გადამღები ჯგუფის წევრ ჰანა გუტიერეშ-რიდს, რომელიც პასუხისმგებელი იყო რეკვიზიტად გამოყენებული იარაღის უსაფრთხოებაზე. გამოძიების თანახმად, ორივე ბრალდებულმა არაერთხელ დაარღვია უსაფრთხოების სტანდარტები.
ტრაგედია 2021 წლის ოქტომბერში, ფილმ Rust-ის ერთ-ერთი სცენის გადაღების დრო მოხდა. ბოლდუინი რეპეტიციას გადიოდა და არ იცოდა, რომ რევოლვერში საბრძოლო ტყვიები იდო. მან ჰატჩინსს შემთხვევით ესროლა და მისი სიცოცხლე იმსხვერპლა. ჰალინა 42 წლის იყო.
თუ სასამართლო ალეკ ბოლდუინსა და ჰანა გუტიერეშ-რიდს დამნაშავეებად ცნობს, მათ 18 თვემდე პატიმრობა და 5000-5000 დოლარით დაჯარიმება ემუქრებათ. თუმცა, იმ გარემოებამ, რომ საქმეში ცეცხლსასროლი იარაღი ფიგურირებს, სასჯელის ვადა შესაძლოა, 5 წლამდე გაიზარდოს.
