ევროკავშირის ქვეყნები შეთანხმდნენ შექმნან სპეციალური მისია უკრაინელი სამხედროების მოსამზადებლად. ამის შესახებ ევროკავშირის საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა ჟოზეპ ბორელმა პრაღაში თავდაცვის მინისტრების არაფორმალურ შეხვედრაზე განაცხადა.
ბორელის განცხადებით, ეს არ არის საბოლოოდ მიღებული გადაწყვეტილება, რადგან არაფორმალურ შეხვედრებზე არ მიიღება გადაწყვეტილებები. შეხვედრაზე თავდაცვის მინისტრები შეთანხმდნენ, დაიწყონ მოსამზადებელი სამუშაოები ასეთი მისიის შესაქმნელად.
მისი თქმით, ევროკავშირი და მისი წევრი ქვეყნები უკრაინის გვერდით დგანან და მზად არიან, გააგრძელონ უკრაინის მხარდაჭერა იმდენ ხანს, რამდენიც საჭირო იქნება.
"დღეს მინისტრებთან ერთად განვიხილეთ ჩვენი უსაფრთხოების და თავდაცვის პოლიტიკა, ძირითადად უკრაინაში რუსეთი აგრესიის კონტექსტში. ჩვენ ჩაგვერთო უკრაინის თავდაცვის მინისტრი, ბატონი რეზნიკოვი, რომელმაც მოგვაწოდა განახლებული ინფორმაცია ომის შესახებ და იმ საჭიროებებზე, რომელიც უკრაინას ესაჭიროება. ჩვენ უნდა ვუპასუხოთ ამ საჭიროებებს და ერთხმად შევთანხმდით ამაზე", – განაცხადა ბორელმა.
ამასთან, ბორელმა განმარტა, თუ რა ამოცანების შესრულებაზე იმუშავებს სპეციალური მისია.
"საუბარია არა მხოლოდ სამხედრო მოქმედებებზე, არამედ მთლიანად იმაზე, თუ როგორ იწარმოება ომი, სწორედ ამას შეისწავლიან სამხედრო მოსამსახურეები. მზად არის რამდენიმე საწვრთნელი ინიციატივა, თუმცა საჭიროებები უზარმაზარია და უნდა მოვახდინოთ ამ საჭიროებების თანმიმდევრულობის განსაზღვრა. ყველა წევრი ქვეყანა ერთხმად შეთანხმდა ამაზე და ასევე იმაზე, რომ დაიწყონ მუშაობა ევროკავშირის სამხედრო დახმარების მისიის პარამეტრების განსაზღვრაზე უკრაინისთვის", - განაცხადა ბორელმა.
მიუხედავად სპეციალური მისიის შექმნაზე შეთანხმების მიღწევისა, ბოლომდე არ არის ცნობილი, როგორც იმუშავებს ეს ინიციატივა. მოელიან, რომ უფრო მეტი დეტალი უახლოეს მომავალში გახდება ცნობილი.
