გაეროს 50-ზე მეტმა წევრმა ქვეყანამ, მათ შორის საქართველომ, უკრაინაში რუსეთის აგრესია დამგმო. ინფორმაცია გამოქვეყნდა გაეროში საქართველოს მუდმივი წარმომადგენლობის "ტვიტერის" გვერდზე.
განცხადების ტექსტი გაეროში გამართულ პრესკონფერენციაზე წაიკითხა უკრაინის წარმომადგენელმა სერჰი კისლიცამ, რომელსაც თან ახლდნენ ხელმომწერი ქვეყნების მუდმივი წარმომადგენლები.
დოკუმენტში ნათქვამია, რომ მოსკოვმა უნდა შეწყვიტოს "საერთაშორისო კანონმდებლობით ნაკისრი ვალდებულებების სრული უგულებელყოფა" და დაუყოვნებლივ, ყოველგვარი წინაპირობის გარეშე, გაიყვანოს ჯარები უკრაინის ტერიტორიიდან.
ქვეყნები, რომლებმაც ხელი მოაწერეს განცხადებას, გამოხატავენ მხარდაჭერას უკრაინის ტერიტორიული მთლიანობისადმი მის საერთაშორისოდ აღიარებულ საზღვრებში.
დოკუმენტს ხელს აწერენ ევროკავშირის ქვეყნები, აშშ, დიდი ბრიტანეთი, შვეიცარია, თურქეთი, საქართველო, მოლდოვა, კანადა და ახალი ზელანდია.
