21 აგვისტოდან, დიდ ბრიტანეთში, რკინიგზის მუშაკების შემდეგ, ქვეყნის უდიდესი საკონტეინერო პორტის, ფელიქსტოუს 2000 მუშა გაიფიცა. მუშებმა 8 დღით შეწყვიტეს მუშაობა.
პროფკავშირ Unite-ის გენერალური მდივნის შერონ გრეჰემის განცხადებით, გაფიცულები პორტის ადმინისტრაციისგან მოითხოვენ ხელფასების ზრდას, "რადგან ცხოვრების ღირებულება გაიზარდა, ხოლო კომპანიის აქციონერები იღებენ კოლოსალურ მოგებას, რომელიც 2020 წელს თითქმის 100 მილიონი ფუნტი იყო".
"პორტი უაღრესად მომგებიანია", - დასძინა გრეჰემმა.
გაფიცვების სერია დიდ ბრიტანეთში 18 აგვისტოს დაიწყო. 3 დღის განმავლობაში, გაფიცვებმა სარკინიგზო მიმოსვლის პარალიზება მოახდინა.
გაფიცვა ფელიქსტოუში არის უახლესი იმ გაფიცვების სერიიდან, რომელიც ორგანიზებული იყო პროფკავშირების მიერ ეკონომიკის სხვადასხვა სექტორში, რათა უზრუნველყონ ხელფასების მასიური ზრდა წლიური 10 პროცენტით, პიკური ინფლაციის პირობებში.
ფელიქსტოუს პორტის ოფიციალურმა წარმომადგენლებმა განაცხადეს, რომ იმედგაცრუებულნი არიან, რადგან პროფკავშირმა მათი წინადადება უარყო. პორტის ოპერატორი კომპანიის განცხადებით, მათი წინადადება იყო ხელფასების "სამართლიანი" ზრდა საშუალოდ 8 პროცენტით და თითქმის 10 პროცენტით ყველაზე დაბალანაზღაურებადი თანამშრომლებისთვის.
გარდა ამისა, პორტი სინანულს გამოთქვამს, რომ გაფიცვა გავლენას ახდენს დიდი ბრიტანეთის მიწოდების ჯაჭვებზე.
ამავდროულად, ბრიტანულ საინფორმაციო სააგენტო PA-სთან ინტერვიუში, პორტის ერთ-ერთმა თანამშრომელმა აღნიშნა, რომ გაფიცვები არის "უხერხულობა, მაგრამ არა კატასტროფა".
ეს არის პირველი გაფიცვა 1989 წლის შემდეგ ინგლისის აღმოსავლეთით მდებარე პორტში, რომელიც წელიწდში დაახლოებით 4 მილიონ კონტეინერს ატარებს.
