რამდენიმეწლიანი დაძაბულობის შემდეგ, ისრაელი და თურქეთი სრულად აღადგენენ დიპლომატიურ კავშირებს და დააბრუნებენ ერთმანეთის ელჩებსა და გენერალურ კონსულებს. წერს თურქეთისა და ისრაელის პრესა.
"თურქეთთან ურთიერთობის აღდგენა მნიშვნელოვანი წვლილია რეგიონული სტაბილურობისთვის და ძალიან მნიშვნელოვანი ეკონომიკური აქტივია ისრაელის მოქალაქეებისთვის", - ციტირებს ისრაელის პრემიერ-მინისტრის იაირ ლაპიდის სიტყვებს The Times of Israel-ი.
თურქეთის საგარეო საქმეთა მინისტრმა მევლუთ ჩავუშოღლუმ, თავის მხრივ, დაადასტურა, რომ თურქეთი და ისრაელი შეთანხმდნენ ელჩების დაბრუნებაზე "ურთიერთობის ნორმალიზებისთვის", მაგრამ "ანკარა გააგრძელებს პალესტინელების მხარდაჭერას".
The Times of Israel- ი აღნიშნავს, რომ "გადაწყვეტილება მიიღეს ლაპიდისა და თურქეთის პრეზიდენტის რეჯებ ტაიპ ერდოღანის ბოლო სატელეფონო საუბრის შემდეგ".
სააგენტო Anadolu-ს ცნობით, უახლოეს მომავალში მხარეები ეკონომიკური თანამშრომლობის გაღრმავების მიზნით, შეხვედრას გამართავენ.
2018 წლის მაისში ღაზის სექტორში, ისრაელ-პალესტინას შორის, ძალადობრივი არეულობების შემდეგ, ანკარამ ისრაელიდან გაიწვია თავისი ელჩი და ისრაელის ელჩს თურქეთის დატოვება მოსთხოვა. ამის შემდეგ მხარეებმა ერთმანეთი მკვეთრად გააკრიტიკეს, მაგრამ 2020 წლიდან მათ ერთმანეთის მიმართ ტონი შეცვალეს და დაახლოებისკენ გადავიდნენ.
