შეერთებული შტატების პოლიციამ მოახდინა თავდამსხმელის იდენტიფიცირება, რომელმაც 12 აგვისტოს ნიუ იორკში დაჭრა სახელგანთქმული მწერალი სალმან რუში.
Associated Press-ის ინფორმაციით, თავდამსხმელი 24 წლის ჰადი მატარია ნიუ ჯერსის შტატიდან.
თავდამსხმელი პოლიციამ დააკავა. მისი მოტივები ჯერჯერობით უცნობია.
75 წლის რუშდი 12 აგვისტოს, კისრისა და მუცლის არეში დაჭრეს ნიუ-იორკის ჩაუტაუკის ინსტიტუტის სცენაზე, როდესაც ლექციის წასაკითხად ემზადებოდა.
მწერალი ჰოსპიტალიზებულია და მართვით სუნთქვაზე იმყოფება. მას ღვიძლის, მკლავის სერიოზული დაზიანება აქვს და შესაძლოა თვალი დაკარგოს.
თავდასხმის შედეგად ასევე დაშავდა ლექციის მოდერატორი, 73 წლის ჰენრი რიზი. მან სახის დაზიანება მიიღო და საავადმყოფოდან უკვე გაწერეს.
ბუკერის პრემიის ლაურეატი სალმან რუშდი ინდური წარმოშობის ბრიტანელი მწერალია. პირველი წარმატება რუშდის მეორე რომანმა "შუაღამის შვილები" (1981) მოუტანა, რომელმაც ბუკერის პრემია მიიღო და პრემიის ისტორიაში საუკეთესო გამარჯვებულად ორჯერ დასახელდა.
მწერლის მეოთხე რომანი "ეშმაკეული აიები", რომელიც 1988 წელს გამოვიდა, მრავალი ქვეყნის მუსლიმთა რისხვის საგანი გახდა. სიურეალისტურმა, პოსტმოდერნულმა რომანმა აღშფოთება გამოიწვია მუსლიმთა ნაწილში, რომელთაც მისი შინაარსი მკრეხელობად მიიჩნიეს და ზოგიერთ ქვეყანაში აიკრძალა კიდეც.
წიგნის გამოქვეყნებიდან ერთი წლის შემდეგ, ირანის უზენაესმა ლიდერმა აიათოლა ხომეინმა გამოსცა ფატვა, სადაც მოითხოვა რუშდის სიკვდილით დასჯა და ამ განაჩენის სისრულეში მოყვანისთვის ჯილდოც კი დააწესა 3 მილიონი დოლარის ოდენობით. მოგვიანებით, ირანის მთავრობა გაემიჯნა ხომეინის ფატვას, თუმცა მწერლის მიმართ მკვეთრად უარყოფითი დამოკიდებულება ირანში მაინც შენარჩუნდა.
ფატვის გამოცემის შემდეგ, გამუდმებული მუქარების შემდეგ, მომდევნო რამდენიმე წელი მწერალი იშვიათად ჩნდებოდა საზოგადოებაში.