მწერალ სალმან რუშდის ნიუ იორკში, ერთ-ერთი უნივერსიტეტის სცენაზე, სადაც სიტყვით უნდა გამოსულიყო, უცნობი პირი დაესხა თავს.
გავრცელებული ინფორმაციით, თავდამსხმელმა რუშდი დანით კისრის არეში დაჭრა.
მწერალი ვერტმფრენის საშუალებით საავადმყოფოში გადაიყვანეს. თავდამსხმელი კი, დარბაზში მყოფებმა შეიპყრეს. მოგვიანებით, ის პოლიციამ დააკავა.
ბუკერის პრემიის ლაურეატი, 75 წლის მწერალი ჩაუტაუკის ინსტიტუტში ლექციის წასაკითხად ემზადებოდა, როდესაც თავს დაესხნენ. რუშდის ჯანმრთელობის მდგომარეობა ამ დროისთვის უცნობია.
სალმან რუშდი ინდური წარმოშობის ბრიტანელი მწერალია. პირველი წარმატება რუშდის მეორე რომანმა „შუაღამის შვილები“ (1981) მოუტანა, რომელმაც ბუკერის პრემია მიიღო და პრემიის ისტორიაში საუკეთესო გამარჯვებულად ორჯერ დასახელდა.
მწერლის მეოთხე რომანი "ეშმაკეული აიები", რომელიც 1988 წელს გამოვიდა, მრავალი ქვეყნის მუსლიმთა რისხვის საგანი გახდა. სიურეალისტურმა, პოსტმოდერნულმა რომანმა აღშფოთება გამოიწვია მუსლიმთა ნაწილში, რომელთაც მისი შინაარსი მკრეხელობად მიიჩნიეს და ზოგიერთ ქვეყანაში აიკრძალა კიდეც.
წიგნის გამოქვეყნებიდან ერთი წლის შემდეგ, ირანის უზენაესმა ლიდერმა აიათოლა ხომეინმა მოითხოვა რუშდის სიკვდილით დასჯა და ამ განაჩენის სისრულეში მოყვანისთვის ჯილდოც კი დააწესა 3 მილიონი დოლარის ოდენობით. მომდევნო რამდენიმე წელი მწერალი იშვიათად ჩნდებოდა საზოგადოებაში.