მოსკოვის ბასმანის სასამართლომ "პირველი არხის" ყოფილ რედაქტორს, მარინა ოვსიანიკოვას შინაპატიმრობა მიუსაჯა. ამის შესახებ მისმა ადვოკატმა დიმიტრი ზახვატოვმა განაცხადა.
"მედიაზონას" ინფორმაციით, სასამართლო პროცესზე ოვსიანიკოვამ გაშალა პლაკატი წარწერით: "დაე, ღამით დაგესიზმროთ დახოცილი ბავშვები".
სასამართლოს გადაწყვეტილებით, ოვსიანიკოვა შინაპატიმრობაში 9 ოქტომბრამდე დარჩება.
მარინა ოვსიანიკოვას წინააღმდეგ აღძრულია სისხლის სამართლის საქმე მუხლით "რუსეთის შეიარაღებულ ძალებზე განზრახ ცრუ ინფორმაციის საჯაროდ გავრცელების შესახებ."
ოვსიანოკოვას თქმით, მის წინააღმდეგ აღძრული სისხლის სამართლის საქმე უკავშირდება კრემლის მახლობლად გამართულ ომის საწინააღმდეგო აქციას, რომელიც მან ივლისში გამართა.
10 აგვისტოს, დილით ოვსიანიკოვას ბინაში ჩხრეკა ჩაატარეს, რის შემდეგაც ის დაკითხვაზე წაიყვანეს.
15 ივლისს მარინა ოვსიანიკოვამ მოსკოვში, კრემლის სიახლოვეს საპროტესტო პერფორმანსი გამართა. მას ხელში პლაკატი ეჭირა წარწერით: "პუტინი მკვლელია. მისი ჯარისკაცები ფაშისტები არიან. დაიღუპა 352 ბავშვი. კიდევ რამდენი ბავშვი უნდა მოკვდეს, რომ გაჩერდე?"
17 ივლისს ჟურნალისტი დააკავეს და ადმინისტრაციული ოქმის შედგენის შემდეგ მალევე გაათავისუფლეს.
შეგახსენებთ, 14 მარტს, საღამოს, რუსეთის პირველი არხის საინფორმაციო გადაცემა "ვრემიას" ეთერში, რედაქტორი მარინა ოვსიანიკოვა შევიდა, რომელსაც ხელში ეჭირა პლაკატი წარწერით: "არა ომს. არ დაუჯეროთ პროპაგანდას. თქვენ აქ გატყუებენ. რუსები ომის წინააღმდეგ".
კადრში გამოჩენიდან მალევე, მარინა ოვსიანიკოვა ადმინისტრაციული წესით დააკავეს. მოგვიანებით, სასამართლომ ოვსიანიკოვა 30 000 რუბლით დააჯარიმა.
