11 აგვისტოს, დიუსელდორფში დაიწყო გერმანიის არმიის (ბუნდესვერი) ყოფილი ოფიცრის სასამართლო პროცეს, რომელსაც ბრალად რუსეთისთვის საიდუმლო სამხედრო ინფორმაციის გადაცემა ედება.

ფედერალური პროკურატურის მტკიცებით, თადარიგის ვიცე-პოლოკოვნიკი, 65 წლის რალფ გ. 2014 წლიდან რუსეთის სამხედრო დაზვერვისთვის (ГРУ) მუშაობდა.

გერმანული საინფორმაციო სააგენტო dpa იტყობინება, რომ ბრალდებული რუსეთის დაზვერვას აწვდიდა ინფორმაციას საჯარო და არასაჯარო წყაროებიდან, მათ შორის გერმანიის მაღალი რანგის სამხედრო პერსონალის პირად საკონტაქტო მონაცემებს.

პროკურორის თქმით, მან ასევე მიაწოდა დაზვერვას "ამერიკის შეერთებული შტატების და მისი დასავლელი მოკავშირეების უსაფრთხოებისა და თავდაცვის პოლიტიკის მიმოხილვა".

ფედერალური პროკურორების მტკიცებით, ბრალდებულმა კარგად იცოდა, რომ რუსეთის სამხედრო დაზვერვისთვის მუშაობდა.

პროკურატურის სპიკერმა გერდ კაიზერმა ჟურნალისტებს განუცხადა, რომ ბრალდებული ბერლინში რუსეთის საელჩოს თანამშრომლებს "ზოგჯერ პირადად, მაგრამ უფრო ხშირად ელექტრონული ფოსტით" უკავშირდებოდა.

dpa-ს ცნობით, როგორც ჩანს, ბრალდებული რუსეთის მიმართ სიმპათიით იყო განწყობილი და დაზვერვას ინფორმაციას სრულიად უსასყიდლოდ აწვდიდა.

როგორც იუწყებიან, გერმანიის სამხედრო კონტრდაზვერვამ მასზე ჯერ კიდევ 2018 წელს იეჭვა, თუმცა მისი სახლი მხოლოდ ორი წლის შემდეგ გაჩხრიკეს.

dpa, დიუსელდორფის რეგიონული სასამართლოს სპიკერზე დაყრდნობით, ამბობს, რომ ბრალდებულმა ნაწილობრივ აღიარა ბრალდებები. ადვოკატის თქმით, მისი დაცვის ქვეშ მყოფი ბრალდებებს მომდევნო სასამართლო სხდომების განმავლობაშიც საჯაროდ გამოეხმაურება.

გერმანიის სისხლის სამართლის კოდექსის მუხლი, რომლის დარღვევაც ედება ბრალად, ითვალისწინებს ჯარიმას ან თავისუფლების აღკვეთას ვადით ხუთ წლამდე.