უკრაინის პრეზიდენტის ოფისის ხელმძღვანელის მრჩეველი, ოლექსი არესტოვიჩი აცხადებს, რომ უკრაინის პრეზიდენტობა სურს. ამის შესახებ მან უკრაინელ ჟურნალისტ დმიტრი გორდონთან ინტერვიუში განაცხადა.
არესტოვიჩის განცხადებით, აპირებს საპრეზიდენტო არჩევნებში იყაროს კენჭი, თუ ვოლოდიმირ ზელენსკი აღარ მიიღებს მონაწილეობას. მისივე თქმით, ომის მიმდინარეობისას, პრეზიდენტობის ამბიციებზე საუბარი შესაძლოა არაკორექტული იყოს, თუმცა აღიარებს, რომ ასეთი ამბიციები აქვს.
"ჩემი რეიტინგი არის დღეს პრეზიდენტ ზელენსკის რეიტინგი. მე ჩემს თავს პრეზიდენტისგან არ გამოვყოფ და არასდროს ვუმუხთლებ ადამიანებს, რომლებთანაც ვმუშაობ. შეიძლება, მე სხვადასხვა მოსაზრებები მქონდეს, მაგრამ მათ არ ვასაჯაროვებ. არასდროს გამომაქვს გარეთ დაპირისპირება... ზელენსკი თუ მეორე ვადით იყრის კენჭს, მე ცხადია, მას არ გადავეღობები, არავითარ შემთხვევაში, ეს ტექნიკურად შეუძლებელია", - განაცხადა არესტოვიჩმა.
მისი თქმით, პრეზიდენტობა იმისთვის სურს, რომ ქვეყნისა და ხალხისთვის ბევრი კარგი რამ გააკეთოს.
