ბელარუსის გაერთიანებული ოპოზიციის ლიდერმა სვიატლანა ციხანოუსკაიამ, რომელიც დევნილობაში იმყოფება, 9 აგვისტოს ვილნიუსში გამართული 2-დღიანი კონფერენციის დასასრულს, ბელარუსის გარდამავალი მთავრობის შექმნის შესახებ განაცხადა.
კონფერენცია ბელარუსში ფართომასშტაბიანი ანტისამთავრობო საპროტესტო მოძრაობის დაწყების მეორე წლისთავს მიეძღვნა.
"ეს არის კოლექტიური აღმასრულებელი ორგანო, რომელიც ყოველდღიურად იმუშავებს ძირითადი მიზნებისთვის - დაიცვას ბელარუსის რესპუბლიკის დამოუკიდებლობა და სუვერენიტეტი, წარმოადგინოს ბელორუსის ეროვნული ინტერესები, განახორციელოს ჩვენი ქვეყნის ფაქტობრივი დეოკუპაცია, აღადგინოს კონსტიტუციური კანონი და წესრიგი, შეიმუშაოს და განახორციელოს ზომები ძალაუფლების უკანონო შენარჩუნების აღსაკვეთად, უზრუნველყოს დიქტატურიდან დემოკრატიაზე გადასვლა, შექმნას პირობები სამართლიანი და თავისუფალი არჩევნებისთვის, შეიმუშავოს და განახორციელოს გადაწყვეტილებები, რომლებიც აუცილებელია ბელორუსში დემოკრატიული ცვლილებების მისაღწევად. და ამის შედეგად ყველა პოლიტპატიმარი უნდა გათავისუფლდეს", - განმარტა ციხანოუსკაიამ.
მან დასძინა, რომ ბელორუსის გაერთიანებული გარდამავალი კაბინეტის შემადგენლობას დაამტკიცებს ბელორუსის ოპოზიციის საკოორდინაციო საბჭო, მაგრამ ომისა და ქვეყნის სუვერენიტეტის დაკარგვის საფრთხის პირობებში, პირველი დანიშვნები იქნება დროებითი - ექვსი თვის ვადით.
ციხანოუსკაიამ დაასახელა დროებითი მთავრობის შემადგენლობა - პაველ ლატუშკა, რომელიც ფოკუსირებული იქნება ძალაუფლების მშვიდობიანად გადაცემაზე, ალექსანდ აზარაუ იმუშავებს კანონისა და წესრიგის აღდგენის საკითხებზე, ვალერი კოვალევსკი საგარეო ურთიერთობების მიმართლებით იმუშვებს, ხოლო ვალერი სახაშჩიკი თავდაცვისა და ეროვნული უსაფრთხოების საკითხებზე.
სვიატლანა ციხანოუსკაიამ ხაზგასმით აღნიშნა, რომ გარდამავალი მთავრობის შექმნის იდეა ბელარუსის ოპოზიციონერთა რიგებში გაჩნდა, რომლებიც დაჟინებით მოითხოვნდნენ ასეთი დროებითი ორგანოს ფორმირებას.
პრეზიდენტობის ყოფილი კანდიდატი, ბელარუსის ოპოზიციის ლიდერი სვიატლანა ციხანოუსკაია 2020 წლის საპრეზიდენტო არჩევნების შემდეგ იძულებული გახდა ქვეყანა დაეტოვებინა. იგი აქტიურად უჭერდა მხარს ბელარუსში არჩევნების გაყალბების ფონზე წარმოქმნილ საპროტესტო ტალღას და ლუკაშენკას რეჟიმზე ზეწოლის გასაძლიერებლად არაერთი შეხვედრა გამართა დასავლეთს ქვეყნების ლიდერებთან.
ალიაქსანდრ ლუკაშენკას საპრეზიდენტო არჩევნებში გამარჯვებულად გამოცხადების შემდეგ, ბელარუსში დაწყებული მასობრივი საპროტესტო აქციების შედეგად, ათასობით ადამიანი დაშავდა, დააპატიმრეს და დააკავეს, მათ შორის ათობით ჟურნალისტი.