შეერთებული შტატების პრეზიდენტმა ჯო ბაიდენმა ხელი მოაწერა შვედეთისა და ფინეთის ნატო-ში გაწევრიანების პროტოკოლებს.
მანამდე, პროტოკოლები ერთხმად დაამტკიცეს აშშ-ის წარმომადგენელთა პალატამ და სენატმა.
ხელმოწერის ცერემონია თეთრ სახლში გაიმართა. მასში პრეზიდენტ ბაიდენის გარდა, ვიცე-პრეზიდენტი კამალა ჰარისიც მონაწილეობდა.
ამრიგად, შეერთებული შტატები გახდა 23-ე ქვეყანა ნატოს 30 წევრი ქვეყნიდან, რომელმაც შვედეთისა და ფინეთის ალიანსში გაწევრიანების პროტოკოლების ეროვნულ დონეზე რატიფიცირება დაასრულა.
9 აგვისტოს მდგომარეობით, პროტოკოლების რატიფიცირება ჯერ კიდევ არ მოუხდენია ნატოს 7 წევრ ქვეყანას - ესპანეთს, საბერძნეთს, პორტუგალიას, სლოვაკეთს, თურქეთს, ჩეხეთსა და უნგრეთს.
შეგახსენებთ, ფინეთისა და შვედეთის ნატო-ში გაწევრიანების პროტოკოლის რატიფიცირება უკვე მოახდინეს აშშ-მა, საფრანგეთმა, იტალიამ, ალბანეთმა, ბელგიამ, ბულგარეთმა, კანადამ, ხორვატიამ, დანიამ, ესტონეთმა, გერმანიამ, ისლანდიამ, ლატვიამ, ლიეტუვამ, ლუქსემბურგმა, მონტენეგრომ, ნიდერლანდებმა, ჩრდილოეთ მაკედონიამ, ნორვეგიამ, პოლონეთმა, დიდმა ბრიტანეთმა, რუმინეთმა, სლოვენიამ.
ფინეთისა და შვედეთის ალიანსში გაწევრიანება საბოლოოდ დასრულდება მას შემდეგ, რაც ყველა წევრი ქვეყნის პარლამენტი პროტოკოლების რატიფიცირებას მოახდენს.
29 ივნისს ნატომ ოფიციალურად მიიწვია შვედეთი და ფინეთი ალიანსში გასაწევრიანებლად.
უკრაინაში რუსეთის მიერ გაჩარებული ომის ფონზე, შვედეთმა და ფინეთმა ნატოში გაწევრიანების განაცხადები ბრიუსელში 18 მაისს წარადგინეს. თავდაპირველად, თურქეთმა განცხადებების განხილვის პროცესი დაბლოკა, თუმცა მოგვიანებით ვეტო მოხსნა.