ჰელსინკიში აიღეს მონუმენტი "მშვიდობა მსოფლიოში", რომელიც საბჭოთა კავშირმა აჩუქა ფინეთს. იტყობინება ფინეთის ერონუვლი მაუწყებელი Yle.
მაუწყებლის ცნობით, ძეგლი, რომელიც ჰაკანიმენრანტას ქუჩაზე იდგა, დღეს დილით კვარცხლბეკიდან აიღეს და ქალაქის ხელოვნების მუზეუმის საწყობში გაგზავნეს. მის ბედს მოგვიანებით ჰელსინკის მერია და მუზეუმის ხელმძღვანელობა გადაწყვეტს.
ჰელსინკის მერიამ მონუმენტის დემონტაჟი ქუჩასა და მიმდებარე მოედანზე სატრანსპორტო მოძრაობის რეორგანიზაციით ახსნა. ძეგლის ადგილას ტროტუარი მოეწყობა.
6.5 მეტრის სიმაღლის ბრინჯაოს კომპოზიცია "მშვიდობა მსოფლიოში" საბჭოთა მოქანდაკეს, ოლეგ კირიუხინს ეკუთვნის. ის ასახავს ადამიანებს სხვადასხვა კონტინენტიდან, რომელთაც ზეცისკენ აქვთ ხელები აპყრობილი და გლობუსი უჭირავთ.
კრემლმა მონუმენტი ფინეთს 1989 წელს უსახსოვრა. გაიხსნა 1990 წლის იანვარში, ბერლინის კედლის დანგრევიდან მალევე. მონუმენტის გახსნას არაერთხელ მოჰყვა კამათი ფინელ საზოგადოებაში. მას არაერთხელ დაესხნენ თავს ვანდალები.
მონუმენტის დემონტაჟის აუცილებლობის შესახებ დებატები ბოლო თვეებში გაჩაღდა უკრაინაში რუსეთის სამხედრო შეჭრის ფონზე.
