შეერთებული შტატების სენატმა დაამტკიცა 434 მილიარდი დოლარის ღირებულების დახმარების პაკეტი, რომელიც სხვა საკითხებთან ერთად, ინფლაციასთან ბრძოლას ისახავს მიზნად.
კანონპროექტის კენჭისყრა სენატში 7 აგვისტოს გაიმართა. მხარი 51-მა სენატორმა დაუჭირა. გადამწყვეტი ხმა აშშ-ის ვიცე-პრეზიდენტს კამალა ჰარისს ეკუთვნოდა.
გავრცელებული ინფორმაციით, დაახლოებით 370 მილიარდი დოლარი დაიხარჯება ენერგეტიკული უსაფრთხოებისა და კლიმატის დაცვაზე, ისევე როგორც მთელ რიგ საგადასახადო შეღავათებზე.
კიდევ 64 მილიარდი გამოიყოფა ჯანდაცვის ინიციატივებზე, კერძოდ, მედიკამენტებზე დაბალი ფასების უზრუნველსაყოფად. გარდა ამისა, კანონპროექტი ითვალისწინებს კორპორაციების საგადასახადო კონტროლის გამკაცრებას.
დემოკრატები იმედოვნებენ, რომ დახმარების მასშტაბური პაკეტის დამტკიცება შესაძლებლობას მისცემს მათ, ნოემბრის შუალედურ არჩევნებზე კონგრესში უმრავლესობა შეინარჩუნონ.
ახლა აღნიშნული კანონპროექტი კონგრესის წარმომადგენელთა პალატამ უნდა დაამტკიცოს, კენჭისყრა 12 აგვისტოს არის დანიშნული.
პრეზიდენტი ბაიდენი მიესალმა სენატის მიერ კანონპროექტის დამტკიცებას და წარმომადგენელთა პალატას მოუწოდა, რაც შეიძლება მალე მიიღოს ის.
"მოუთმენლად ველი, როდის მოვაწერ ხელს კანონპროექტს", - თქვა ჯო ბაიდენმა.
