თურქეთის პრეზიდენტმა რეჯებ ტაიპ ერდოღანმა მმართველი "სამართლიანობისა და განვითარების პარტიის" ცენტრალური აღმასრულებელი კომიტეტის სხდომაზე განაცხადა, რომ რუსეთი და არაბთა გაერთიანებული საამიროები დაინტერესებულნი არიან თურქული დრონების წარმოებით. იტყობინება CNN Turk-ი.
ერდოღანის თქმით, რუსეთი და არაბთა გაერთიანებული საამიროები გამოდიან შეთავაზებით, რომ მათ ქვეყნებში გაიხსნას თურქული დრონის - Bayraktar TB-2-ის მწარმოებელი ქარხნები.
"პუტინმა თქვა - მოდით, ვიმუშაოთ ერთად", - აღნიშნა ერდოღანმა.
თურქეთის ხელისუფლების ოფიციალურ წარმომადგენლებს აღნიშნულ საკითხზე კომენტარი არ გაუკეთებიათ.
შეგახსენებთ, გასულ კვირას, თურქული უპილოტო საფრენი აპარატების მწარმოებელი კომპანია Baykar Makina-ს აღმასრულებელმა დირექტორმა ჰალუკ ბაირაქთარმა განაცხადა, რომ რუსეთისთვის დრონების მიწოდებას არ აპირებს.
"ჩვენ არასდროს გავაკეთებდით ასეთ რამეს. იმიტომ, რომ ჩვენ მხარს ვუჭერთ უკრაინის წინააღმდეგობას, მის სუვერენიტეტსა და დამოუკიდებლობას", - განაცხადა მან.
მისი თქმით, თურქული დრონები უკრაინის დამოუკიდებლობისთვის ბრძოლის ერთ-ერთ სიმბოლოდ იქცა და ეს მწარმოებლისთვის დიდი სიამაყეა.
