საპროტესტო მღელვარება გრძელდება ინდოეთის ოკეანის კუნძულოვან სახელმწიფო შრი-ლანკაში, რომლის დედაქალაქის ქუჩები დილიდან სავსეა ათეულ ათასობით დემონსტრატით.
მოქალაქეები მთელი ქვეყნიდან აპროტესტებენ ეკონომიკურ კრიზისს, პრეზიდენტისა და პრემიერ-მინისტრის უუნარობას და მათ დაუყოვნებლივ გადადგომას მოითხოვენ.
ცოტა ხნის წინ გავრცელდა ცნობა, რომ მომიტინგეები შეიჭრნენ შრი-ლანკის პრემიერ-მინისტრის რანილ ვიკრამასინგჰეს კერძო რეზიდენციაში, რომელშიც ის ოჯახთან ერთად ცხოვრობს და ცეცხლი წაუკიდეს.
როგორც იუწყებიან, უსაფრთხოების სამსახურებმა პრემიერ-მინისტრი და მისი ოჯახი შეჭრამდე ცოტა ხნით ადრე გაიყვანეს რეზიდენციიდან.
მანამდე, რამდენიმე საათით ადრე, პრემიერ-მინისტრმა რანილ ვიკრამასინგჰემ განაცხადა, რომ მზადაა თანამდებობა დატოვოს.
დღის განმავლობაში, აქციის მონაწილეები ასევე შეიჭრნენ პრეზიდენტის რეზიდენციაში. პოლიციამ მომიტინგეების დასაშლელად ცრემლსადენი გაზი გამოიყენა. AFP-ის ცნობით, პრეზიდენტმა რეზიდენცია დემონსტრანტების შიგნით შესვლამდე რამდენიმე წუთით ადრე დატოვა.
