თეატრის ლეგენდარული ბრიტანელი რეჟისორი პიტერ ბრუკი 97 წლის ასაკში პარიზში გარდაიცვალა.
პიტერ ბრუკი 1974 წლიდან საფრანგეთში ცხოვრობდა.
მისი თაობის ერთ-ერთი ყველაზე გამოჩენილი და ამავდროულად, საკამათო რეჟისორის სპექტაკლები, მრავალი ათეული წლის განმავლობაში აღაფრთოვანებდა პუბლიკას.
პიტერ ბრუკი 1925 წლის მარტში, დასავლეთ ლონდონში, ებრაელი ემიგრანტის ოჯახში დაიბადა.
ის ოქსფორდის უნივერსიტეტში ენათმეცმიერებას სწავლობდა. 20 წლის ასაკი ბირმინგემის ერთ-ერთი თეატრის დირექტორად დაინიშნა.
40-იან წლებში, ბრუკი ლონდონის სამეფო ოპერის თეატრში რეჟისორად მუშაობდა. ამ დიდებული თეატრის სცენაზე მან რამდენიმე სპექტაკლი დადგა, მათ შორის "ბოჰემა" და "სალომე".
ერთ ხანს, პიტერ ბრუკი ნიუ იორკის მეტროპოლიტენ ოპერის თეატრის დირექტორის თანამდებობას იკავებდა.
ერთ-ერთ ინტერვიუში, პიტერ ბრუკი ამბობდა, რომ ბრიტანული ომისშემდგომი თეატრი გახდა "მოძველებული, სტერეოტიპული, რომელიც ძალიან ჩვეულებრივი ადამიანების ხელში აღმოჩნდა, ვინც შექსპირს ყველაზე მოსაწყენი ინტერპრეტაციით წარუდგენდა აუდიტორიას".
1970-იან წლებში მან ზურგი აქცია ინგლისურ თეატრს და გადავიდა პარიზში, სადაც დააარსა თეატრალური კვლევის საერთაშორისო ცენტრი, ექსპერიმენტული თეატრალური კომპანია.
თავის თეატრალურ საზოგადოებასთან ერთად, ბრუკმა მრავალ ქვეყანაში იმოგზაურა, სადაც არაერთი სპექტაკლი დადგა სხვადასხვა აუდიტორიისთვის ექსპერიმენტულ გარემოში, მათ შორის ნარკოდამოკიდებული ადამიანებისა და ფსიქიკური ჯანმრთელობის მქონე პაციენტებისთვის.
ერთ-ერთი გამორჩეული ნაწარმოები, რომელიც მან დადგა საფრანგეთში, ავსტრალიასა და ამერიკაში, იყო "ფრინველთა სიტყვა", დაფუძნებული შუასაუკუნეების სპარსულ პოემაზე. ეს სპექტაკლი ავსტრალიაში კარიერზე (სამთო საბადო) იქნა ნაჩვენები.
მონუმენტური მნიშვნელობისაა მისი ნამუშევარი "მაჰაბჰარტა", სანსკრიტზე შექმნილი ეპიკური პოემის ცხრასაათიანი დრამატიზაცია, რომელიც მრავალ ქვეყანაში იქნა წარმოდგენილი.
მის თეატრალურ დადგმებში ცნობილი მსახიობები მონაწილეობდნენ, მათ შორის ჯონ გილგუდი, პოლ სკოფილდი და ლოურენს ოლივიე.
