სულ მცირე ხუთი ადამიანი დაიღუპა და ათობით დაშავდა ირანის სამხრეთში მდებარე ჰორმოზგანის პროვინციაში მიწისძვრის შედეგად.
როგორც იუწყებიან, პროვინციაში რამდენიმე მიწისძვრა დაფიქსირდა. ნგრევა და მსხვერპლი სამმა მიწისძვრამ გამოიწვია, მათგან ორი იყო 6.3 მაგნიტუდის, ხოლო 1 - 6.1 მაგნიტუდისა.
სახელმწიფო სააგენტო IRNA-ს ცნობით, ყველა მსხვერპლი პირველი ძლიერი მიწისძვრის შედეგად დაიღუპა, მომდევნო ორ მძლავრ მიწისძვრას მსხვერპლი არ მოჰყოლია, "რადგან მოსახლეობა უკვე ქუჩებში იყო გამოსული".
ადგილობრივი ხელისუფლების ცნობით, სულ მცირე 30 მიწისქვეშა ბიძგი იგრძნობოდა. მათი თქმით, ბიძგები ასევე იგრძნობოდა მეზობელ არაბთა გაერთიანებულ საემიროებში.
მიწისძვრის შედეგად ათასობით ადამიანი გამოვიდა ქუჩებში, სადაც მთელი ღამე გაატარეს. ბევრი ადამიანი კვლავ რჩება კარვებში, რომლებიც ადგილობრივმა ხელისუფლებამ და საგანგებო ვითარებათა სამსახურებმა მოაწყვეს.
წითელი ნახევარმთვარის ადგილობრივი სამსახურის წარმომადგენლებმა ირანის სახელმწიფო მედიას განუცხადეს, რომ სამძებრო-სამაშველო სამუშაოები დასრულდა და მეტი მსხვერპლი არ არის მოსალოდნელი.
მათი თქმით, ახლა ყველაზე დიდი გამოწვევა არის კარვებში, სადაც მიწისძვრის შედეგად დაზარალებულები იმყოფებიან, გაგრილების სისტემების დამონტაჟება, რადგან ჰაერის ტემპერატურა 45 გრადუს ცელსიუსამდე აღწევს.
სოციალურ მედიაში და სახელმწიფო ტელევიზიის მიერ გავრცელებულ ვიდეოებში ნაჩვენებია რამდენიმე სოფელში დანგრეული სახლები. ათეულმა სოფელმა ასევე მოკლე დროში დაკარგა ელექტროენერგია.
ირანის სამხრეთ პროვინციებში ბოლო დროს რამდენიმე ძლიერი მიწისძვრა მოხდა. სახელმწიფო ტელევიზიამ განაცხადა, რომ ბოლო ერთი თვის განმავლობაში 150 მიწისძვრა და ბიძგი დაფიქსირდა დასავლეთ ჰორმოზგანში.