გაერთიანებული ერების განათლების, მეცნიერებისა და კულტურის ორგანიზაციამ (UNESCO) კერძი ბორშჩი გამოაცხადა უკრაინის ეროვნულ კულტურულ მემკვიდრეობად, რომელსაც დაცვა სჭირდება.
შესაბამისი გადაწყვეტილება UNESCO-ს არამატერიალური კულტურული ფასეულობების დაცვის კომიტეტმა 1-ელ ივლისს მიიღო.
გადაწყვეტილებას მიესალმა უკრაინის უკრაინის კულტურის მინისტრი ოლექსანდრ ტკაჩენკო.
"ბორშჩის ომში გამარჯვება ჩვენ გვეკუთვნის", - დაწერა ტკაჩენკომ "ტელეგრამის" არხზე და დასძინა, რომ UNESCO-მ ეს გადაწყვეტილება უკრაინის მთავრობის მოთხოვნის შესაბამისად მიიღო, რომელიც ჯერ კიდევ გასული წლის მარტში გაიგზავნა.
რუსეთის მიერ გაჩაღებული ომის შემდეგ, უკრაინამ მიმართა UNESCO-ს და სთხოვა გადაწყვეტილების დაჩქარებულად განხილვა.
"ჩვენ სიამოვნებით გავუზიარებთ ბორშს და მის რეცეპტებს ყველა ცივილიზებულ ქვეყანას. და ასევე არაცივილიზებულს, რათა მათ მაინც ჰქონდეთ რაღაც მსუბუქი, გემრიელი და უკრაინული", - დაწერა ტკაჩენკომ სოციალურ ქსელში, რითაც გამოეხმაურა რუსეთის საგარეო საქმეთა სამინისტროს ოფიციალური წარმომადგენლის, მარია ზახაროვას ადრინდელ კომენტარს, რომლის თანახმადაც ზახაროვა ბორშჩის უკრაინულ კერძად აღიარებას "უკრაინული ექსტრემიზმისა და ნაციზმის გამოვლინებას" უწოდებდა.
"ეს "ექსტრემიზმის გამოვლინება" უკვე ოფიციალურად უკრაინულია და ოფიციალურად იუნესკოს მფარველობის ქვეშაა", - დასძინა ტკაჩენკომ.
რუსეთის საგარეო საქმეთა სამინისტრო თავის ოფიციალურ ვებგვერდზე ხშირად აღნიშნავს, რომ ბორშჩი "რუსულ ტრადიციულ და ეროვნულ კერძებს მიეკუთვნება".
