ნატო ოფიციალურად იწვევს ფინეთსა და შვედეთს, გახდნენ ალიანსის წევრები. ამის შესახებ ნათქვამია ნატოს მადრიდის სამიტის დეკლარაციაში.
"ჩვენ გადავწყვიტეთ, მივიწვიოთ ფინეთი და შვედეთი ნატო-ს წევრებად და შევთანხმდით, რომ ხელი მოვაწეროთ გაწევრიანების პროტოკოლებს", - აღნიშნულია დეკლარაციაში.
დეკლარაციის თანახმად, ფინეთისა და შვედეთის ნატოში გაწევრიანება უზრუნველყოფს ამ ქვეყნების დაცვას, ალიანსის გაძლიერებას და ტრანსატლანტიკური საზოგადოების უსაფრთხოების განმტკიცებას.
ნატომ ასევე დაადასტურა ალიანსის „ღია კარის“ პოლიტიკის ერთგულება.
"ჩვენ ვადასტურებთ ნატო-ს ღია კარის პოლიტიკისადმი ჩვენს ერთგულებას. დღეს ჩვენ გადავწყვიტეთ მოვიწვიოთ ფინეთი და შვედეთი ნატო-ს წევრებად და შევთანხმდით, რომ ხელი მოვაწეროთ გაწევრიანების პროტოკოლებს. ალიანსში ნებისმიერი გაწევრიანების დროს, სასიცოცხლოდ მნიშვნელოვანია, რომ ყველა მოკავშირის უსაფრთხოებასთან დაკავშირებული ლეგიტიმური შეშფოთებები სათანადოდ იყოს გათვალისწინებული. ფინეთისა და შვედეთის გაწევრიანება გახდის მათ უფრო უსაფრთხოს, ნატო-ს უფრო ძლიერს და ევროატლანტიკურ სივრცეს უფრო დაცულს. ფინეთის და შვედეთის უსაფრთხოება ალიანსისთვის პირდაპირი მნიშვნელობისაა, მათ შორის გაწევრიანების პროცესის მიმდინარეობისას", - აღნიშნულია სამიტის დეკლარაციაში.
სამშაბათს საღამოს ცნობილი გახდა, რომ თურქეთი ფინეთისა და შვედეთის ნატოში გაწევრიანებას დათანხმდა.
შვედეთი და ფინეთი გახდებიან ნატოს წევრები, როდესაც ყველა წევრი ქვეყნის პარლამენტი დაამტკიცებს გაწევრიანების პროტოკოლებს.
