ფინეთის პრეზიდენტმა საული ნიინისტემ და შვედეთის საგარეო საქმეთა მინისტრმა ენ ლინდემ განაცხადეს, რომ მათ მიაღწიეს გარკვეულ პროგრესს თურქეთთან მოლაპარაკებებში, რომელიც ბლოკავს ორი ქვეყნის აპლიკაციას ნატოში გაწევრიანების შესახებ. ამის შესახებ Reuters-ი იტყობინება.
"ჩვენ მზად ვართ, რომ რაღაც პოზიტიური მოხდეს დღეს, მაგრამ ამას შეიძლება მეტი დრო დასჭირდეს. ამ შემთხვევაში მოთმინებას გამოვიჩენთ და [ნატოს მადრიდის] სამიტის შემდეგაც გავაგრძელებთ დისკუსიას", - განაცხადა ლინდემ.
ენ ლიდენსგან განსხვავებით, უფრო ფრთხილი კომენტარი გააკეთა ფინეთის პრეზიდენტმა საული ნიინისტომ. მან დაადასტურა, რომ მოლაპარაკებებში მეტ ურთიერთგაგებას მიაღწიეს, თუმცა ჯერჯერობით არც ოპტიმისტურად, არც პესიმისტურად არ არის განწყობილი.
"ზოგადი კონსენსუსი არის ის, რომ დისკუსიებმა უკეთესად ჩაიარა, რაც იმას ნიშნავს, რომ ურთიერთგაგება გარკვეულწილად გაუმჯობესდა ორივე მხარეს", - განუცხადა მან ჟურნალისტებს მადრიდში, სადაც ნატოს სამიტი გაიხსნა.
მადრიდში ნატოს სამიტზე გამგზავრებამდე ერდოღანმა განაცხადა, რომ სკანდინავიურმა ქვეყნებმა თურქეთის შეშფოთება უნდა გაითვალისწინონ და არა მხოლოდ სიტყვებით, არამედ საქმითაც დაადასტურონ, თუ მათ სურთ გახდნენ ნატოს წევრები.
ერდოღანმა ასევე თქვა, რომ სამიტზე მას სურს აჩვენოს "დოკუმენტები, ინფორმაცია და სურათები", რომლებიც, მისი თქმით, ადასტურებს შვედეთისა და ფინეთის მხარდაჭერას ტერორისტული ორგანიზაციების მიმართ.
სამიტის ფარგლებში თურქეთს პრეზიდენტი რეჯებ ტაიპ ერდოღანი შეხვდება შვედეთის პრემიერ-მინისტრ მაგდალენა ანდერსონს და ფინეთის პრეზიდენტ საული ნიინისტოს, რათა განიხილონ ამ ქვეყნების ალიანსში გაწევრიანება, რომელსაც ამ დრომდე ბლოკავს ანკარა.
ერდოღანი სტოკჰოლმსა და ჰელსინკის ქურთისტანის მუშათა პარტიის, მემარცხენე ექსტრემისტული ჯგუფის DHKP-C-სა და აშშ-ში მცხოვრები მქადაგებლის ფეთულა გიულენის მხარდაჭერაში ადანაშაულებს.
ვარაუდობენ, რომ თურქეთის დაჟინებული მოთხოვნით, შვედეთი და ფინეთი, ანკარის ვეტოს მოხსნის სანაცვლოდ, გაამკაცრებენ პოზიციებს ქურთისტანის მუშათა პარტიისა და სხვა ჯგუფების წინააღმდეგ.
შვედეთმა და ფინეთმა ნატოში გაწევრიანების განაცხადები ბრიუსელში 18 მაისს წარადგინეს. ნატოში გაწევრიანებისთვის მისი ყველა, 30-ვე წევრის თანხმობაა საჭირო.
თურქეთი ნატო-ს წევრი ერთადერთი ქვეყანაა, რომელიც ალიანსში შვედეთისა და ფინეთის გაწევრიანების წინააღმდეგია. არაოფიციალური ინფორმაციით, ერდოღანი იმედოვნებს, რომ მიიღებს გარკვეულ დათმობებს შეერთებული შტატებისგან თვითმფრინავების გაყიდვასა და თურქეთის მიმართ რუსული С-400 შეძენაზე სანქციებთან დაკავშირებით.
