ფინანსთა სამინისტროსთან არსებული დავების განხილვის საბჭო მის მიერ მიღებული მნიშვნელოვანი გადაწყვეტილებების გამოქვეყნებას იწყებს
ფინანსთა სამინისტროში ამბობენ, რომ საბჭოს გადაწყვეტილებების გამოქვეყნება გადამხდელებს სამინისტროს სისტემის მიდგომის გაცნობაში დაეხმარება, რაც მეწარმეებს საშუალებას მისცემს თავიანთი საქმიანობა სწორად აწარმოონ.
როგორც დღეს, ფინანსთა სამინისტროში საგანგებოდ გამართულ ბრიფინგზე სამინისტროს დავების განხილვის სამსახურის უფროსმა დავით თომაძემ განაცხადა, 29 ნოემბრის სხდომაზე წარმოება დასრულდა 24 საჩივართან დაკავშირებით, რომელთაგან საბჭომ მნიშვნელოვნად მიიჩნია ოთხი საქმია გამოყოფა: ესენია შპს "მაზა მანგო"; შპს "ზიმო"; "იუჩე ერელისი" და ინდ მეწარმე "მანანა მაჭავარიანი".
შპს "მაზა მანგო" - ანგარიშფაქტურაში დაშვებული მცირე შეცდომა საბჭომ არ მიიჩნია მომჩივნის დაჯარიმების საკმარის საფუძვლად და დარიცხული სანქცია გააუქმა.
შპს "ზიმო" - საბჭომ დაადგინა, რომ უძრავი ქონების რეალიზაცია საჯარო რეესტრში საკუთრების უფლების რეგისტრაციამდე დღგ-თი არ უნდა დაბეგრილიყო.
"იუჩე ერელისი" - საბჭომ ჩათვალა, რომ კონტრაბანდული ტვირთის საქართველოში შემოტანისას პირისთვის სატრანსპორტო საშუალების ამორთმევა მართლზომიერი იყო.
ინდ. მეწარმე "მანანა მაჭავარიანი" - საგადასახადო ორგანოს მიერ გადამხდელის პირად ბარათზე ასახული გადახდილი თანხების შესახებ ინფორმაციის წარმოუდგენლობა საჩივრის დაკმაყოფილების საფუძველი გახდა.
როგორც დღეს გამართულ ბრიფინგზე დავით თომაძემ განაცხადა, შპს "მაზა მანგომ" დარიცხვის საფუძველს წარმოადგენდა ის გარემოება, რომ მომჩივანს მცირე შეცდომა ჰქონდა დაშვებული საგადასახადო ანგარიშფაქტურაში მითითებულ საიდენტიფიკაციო ნომერში.
შემოსავლების ამსახველმა მიიჩნია, რომ ეს შეცდომა უტოლდებოდა ფაქტურის არასწორად შევსებას, რის გამოც მომჩივანს საგადასახადო კოდექსით განსაზღვრული ჯარიმა დაერიცხა.
დავების განხილვის საბჭომ შეაფასა ფაქტობრივი გარემოებები და მიიჩნია, რომ ანგარიშფაქტურაში საიდენტიფიკაციო კოდში მცირე შეცდომა არ შეიძლებოდა ჩათვლილიყო ფაქტურის არასრულად შევსებად, რის გამოც სრულიად გააუქმა დაკისრებული სანქცია.
ხოლო რაც შეეხება შპს "ზიმოს", მასზე დარიცხვის საფუძველს წარმოადგენდა ის რომ მომჩივანს რეალიზებული ჰქონდა არასასოფლო სამეურნეო დანიშნულების მიწის ნაკვეთი, მასზე არსებულ შენობასთან ერთად.
მომჩივანი მიიჩნევდა რომ მიწის ნაკვეთის რეალიზაცია არ წარმოადგენდა დამატებული ღირებულების გადასახადის დასაბეგრ ოპერაციას.
შემოსავლების სამსახურმა იმ მოტივით რომ საჯარო რეესტრში მიწის ნაკვეთი და შენობა ცალ ცალკე არ იყო რეგისტრირებული, მიწისა და შენობის რეალიზაცია ერთიან ოპერაციად მიიჩნია და დამატებული ღირებულების გადასახადი დაარიცხა როგორც შენობის ასევე მიწის ნაკვეთის მიწოდების ოპერაციაზე.
დავების განხილვის საბჭო დაეთანხმა შემოსავლების სამსახურის მსჯელობას იმ ნაწილში, რომ შენობისა და მიწის ნაკვეთის რეალიზაცია წარმოადგენდა შერეულ ოპერაციას, იგი სრულად ექვემდებარებოდა დამატებული ღირებულების გადასახადით დაბეგვრას, თუმცა დაადგინა, რომ მიწოდებული ქონების ნაწილი საჯარო რეესტრში იყო რეგისტრირებული ახალ მესაკუთრეზე. შესაბამისად საჯარო რეესტრში საკუთრების უფლების რეგისტრაციამდე დამატებული ღირებულების გადასახადით დაბეგვრა არამართლზომიერად ჩაითვალა და ამ ნაწილში დარიცხვა გაუქმდა.
"იუჩე ერელისის" დავის საგანს წარმოადგენდა საბაჟო კონტროლის გვერდის ავლით გადაადგილებული ტვირთისა და სატრანსპორტო საშუალებების ჩამორთმევა. საბჭომ სრულიად გაიზიარა შემოსავლების სამსახურის პოზიცია რომ კონტრაბანდული გზით გადაადგილებული ტვირთი და გამოყენებული საშუალება საქართველოს კანონმდებლობის შესაბამისად ექვემდებარებოდა ჩამორთმევას. არ გაითვალისწინა ის გარემოება, რომ სატრანსპორტო საშუალება არ წარმოადგენდა მძღოლის საკუთრებას და შესაბამისად ძალაში დატოვა შემოსავლების სამსახურის გადაწყვეტილება.
ინდ მეწარმე "მანანა მაჭავარიანის" დავას საგანს წარმოადგენდა მომჩივნის მიმართ შეუსრულებელი საგადასახადო ვალდებულებებისთვის გამოყენებული უზრუნველყოფის ღონისძიება. მომჩივანმა წარმოადგინა მის მიერ დეკლარირებული გადასახადების გადახდის დამადასტურებელი დოკუმენტი, ხოლო შემოსავლების სამსახურმა ვერ წარმოადგინა რაიმე მტკიცებულება, რომ ეს თანხები უკვე ასახული იყო გადამხდელის პირად ბარათზე. აღნიშნულიდან გამომდინარე საბჭომ მიიღო გადაწყვეტილება, მომჩივნის მიერ წარმოდგენილი დოკუმენტის გათვალისწინებით მისი საგადასახადო ვალდებულების გაუქმების თაობაზე.