რაც უფრო მალე შეასრულებთ პირობებს, მით უფრო მალე იქნება პროგრესი, - განაცხადა ბრიუსელში გამართულ პრესკონფერენციაზე, ევროკომისიის პრეზიდენტმა ურსულა ფონ დერ ლაიენმა ქართველი ჟურნალისტის შეკითხვის საპასუხოდ.
ევროკომისიის პრეზიდენტმა ხაზგასმისთ აღნიშნა, რომ საქართველოსთვის ევროკავშირის კარები ღიაა, თუმცა საჭიროა პირობების დაკმაყოფილება.
"უზარმაზარი წინგადადგმული ნაბიჯი საქართველოსთვის, რომ მიიღოს ევროპული პერსპექტივა. კარები ფართოდ არის ღია და ახლა საქართველოზეა დამოკიდებული, რომ გადადგას ყველა საჭირო ნაბიჯი, რათა წინ წაიწიოს მთელმა ქვეყანამ და აჩვენოს, რომ გსურთ აქტიურად ჩაერთოთ ამ პროცესში. თქვენზე არის დამოკიდებული, რაც უფრო მალე შეძლებთ ამ პირობების დაკმაყოფილებას, მით უფრო მალე მიაღწევთ პროგრესს, შესაბამისად, საქართველოს ხელშია, რომ დააჩქაროს ეს პროცესში და წაიწიოს წინ ამ ღია კარებისკენ", - თქვა ურსულა ფონ დერ ლაიენმა.
მანამდე, გაფართოების საკითხებში ევროკომისარმა ოლივერ ვარჰეიმ პრესკონფერენციაზე ისაუბრა იმ ნაბიჯების შესახებ, რომლის გადადგმასაც საქართველოსგან მოელიან.
ვარჰეის განცხადებით, უმნიშვნელოვანესია პოლიტიკური პოლარიზაციის დასრულება. მან ასევე შარლ მიშელის შეთანხმების აუცილებლობაზეც ისაუბრა.
"ჩვენ გვსურს ყველა პოლიტიკური პარტიის თანამშრომლობა და იმ შეთანხმების შესრულება, რომელიც მიღწეული იყო ევროკავშირის შუამავლობით. ეს ასევე მოიცავს მართლმსაჯულების რეფორმას, რადგან ეს შეთანხმება ეხება ამ საკითხსაც. ასევე გვჭირდება პროგრესი კორუფციასთან ბრძოლის კუთხით. ანტიკორუფციული სააგენტოს დამოუკიდებლობა უნდა იყოს უზრუნველყოფილი. ჩვენ ასევე გვჭირდება ბრძოლის გაძლიერება ორგანიზებულ დანაშაულთან, გვჭირდება აქტიური, ჯანსაღი გამოძიება, გასამართლება და სანდო შედეგებზე დაფუძნებული ისტორია. და ბოლოს, ფუნდამენტურ უფლებებზე ჩვენ გვჭირდება, რომ გრანტირებული იყოს თავისუფალი, პროფესიონალური და პლურალისტული და დამოუკიდებელი მედიაგარემო ჟურნალისტებისთვის", - განაცხადა ევროკომისარმა.
შეგახსენებთ, ევროკომისიამ უკრაინისა და მოლდოვისთვის კანდიდატის სტატუსის მინიჭების რეკომენდაცია გასცა. საქართველოს კი სტატუსის მისაღებად პირობების დაკმაყოფილება მოუწევს.
კანდიდატის სტატუსის მინიჭებაზე საბოლოო გადაწყვეტილებას ევროპული საბჭო ივნისის ბოლოს მიიღებს.
