გერმანიის კანცლერმა ფრიდრიხ მერცმა აშშ-ის პრეზიდენტ დონალდ ტრამპს მოუწოდა, მომავალ კვირას ჩინეთში რუსეთის პრეზიდენტ ვლადიმერ პუტინთან უკრაინის საკითხზე მოსალოდნელი მოლაპარაკებების დროს მოულოდნელი ნაბიჯები არ გადადგას. ამის შესახებ Reuters წერს.
მერცის თქმით, დუბლინში შეკრებილი ზოგიერთი ევროპელი ლიდერი შიშობს, რომ შეხვედრა შესაძლოა „ანკორიჯის მეორე ეპიზოდად“ იქცეს.
„აქ, დუბლინში, ზოგიერთი შიშობს, რომ ეს შესაძლოა „ანკორიჯის მეორე ეპიზოდად“ იქცეს“, - განაცხადა მერცმა და მიანიშნა 2025 წლის აგვისტოში, ალასკაზე, ტრამპისა და პუტინის შეხვედრაზე.
ევროპელი ლიდერები მაშინ ამ სამიტს უკრაინაში ომის დასრულებისკენ მიმართულ ძალისხმევაში შესაძლო გარდამტეხ მომენტად განიხილავდნენ.
„ამიტომ მსურს, ძალიან მკაფიოდ გავაჟღერო ჩვენი გზავნილი შეერთებული შტატებისადმი: გთხოვთ, ყოველგვარი მოულოდნელობის გარეშე. განაგრძეთ მოქმედება „ევროპის გუნდის“ ან „უკრაინის გუნდის“ შემადგენლობაში“, - ხაზგასმით აღნიშნა მერცმა.
მერცი ევროკავშირის ლიდერებს მოუწოდებს, ევროკავშირის ახალი, შვიდწლიანი ბიუჯეტის შესახებ მოლაპარაკებების ფარგლებში უკრაინის მხარდაჭერის ვალდებულება აიღონ. მისი თქმით, ამ ინიციატივას ფართო მხარდაჭერა აქვს, თუმცა შეთანხმების მიღწევამდე ჯერ კიდევ დიდი გზაა გასავლელი.
გერმანიის კანცლერმა ასევე დაადასტურა, რომ უახლოეს კვირებში პირველად იგეგმება უკრაინის საკითხზე არსებითი სამშვიდობო მოლაპარაკებები, რომლებშიც ევროპაც მიიღებს მონაწილეობას.
ამასთან, მერცმა უარყო რუსეთის მოწოდება, მოლაპარაკებების მთავარ საკითხად ევროპის უსაფრთხოების არქიტექტურის განხილვა იქცეს. მისი თქმით, ასეთი უსაფრთხოების სისტემა უკვე არსებობს ნატო-ს სახით.
