საფრანგეთში ეროვნული ასამბლეის, პარლამენტის ქვედა პალატის არჩევნების პირველი ტური მიმდინარეობს.
საპარლამენტო არჩევნები ორ ტურად - 12 ივნისსა და 19 ივნისს გაიმართება. საფრანგეთის მოქალაქეები საკანონმდებლო ორგანოს ქვედა პალატის 577 დეპუტატს აირჩევენ.
ადგილობრივი მედიის ინფორმაციით, გამარჯვების მოსაპოვებლად მთავარი ბრძოლა სამ საარჩევნო ბლოკს შორის გაიმართება - ცენტრისტული "ერთად", რომელიც პრეზიდენტ მაკრონის პარტიის გარშემო შემოიკრიბა, მემარცხენე პარტია ჟან-ლუკ მელენშონის მეთაურობით და მემარჯვენე ალიანსი, რომელიც რესპუბლიკური პარტიის მონაწილეობით შეიქმნა.
მარინ ლე პენის ულტრამემარჯვენე "ეროვნული გაერთიანების" პარტია არჩევნებში დამოუკიდებლად მონაწილეობს.
ბოლო გამოკითხვების თანახმად, გამარჯვების ყველაზე მაღალი შანსი აქვს საარჩევნო ბლოკს "ერთად", თუმცა შესაძლოა, ვერ მოიპოვოს პარლამენტში აბსოლუტური უმრავლესობა, 289 მანდატი 577-დან.
2017 წლის არჩევნებზე მაკრონის პარტიამ აბსოლუტური უმრავლესობით გაიმარჯვა და მიიღო 308 მანდატი, რამაც გზა გაუხსნა ელისეის სასახლეს დაუბრკოლებლად მიეღო ყველა მისთვის სასურველი კანონი.
არჩევნების საბოლოო შედეგები მეორე ტურის, 19 ივნისის შემდეგ გახდება ცნობილი.
მანამდე გავრცელდა ინფორმაცია, რომ ფრანგების მხოლოდ 46% აპირებს არჩევნებზე წასვლას, რაც შესაძლოა, ყველაზე დაბალი აქტივობა იყოს 1958 წლის შემდეგ.
