შეერთებული შტატები მსოფლიოს ქვეყნებს სანქტ-პეტერბუგის ეკონომიკური ფორუმის ბოიკოტისკენ მოუწოდებს. შესაბამისი განცხადება სახელმწიფო დეპარტამენტის სპიკერმა ნედ პრაისმა გაავრცელა.
"აშშ-ს მთავრობა არ მიიღებს მონაწილეობას სანქტ-პეტერბურგის საერთაშორისო ეკონომიკურ ფორუმში. ჩვენ მოვუწოდებთ მთავრობებს და კომპანიებს შეუერთდნენ ჩვენს ბოიკოტს", - დაწერა პრაისმა ტვიტერზე.
სახელმწიფო დეპარტამენტი იმედოვნებს, რომ ბოიკოტი იქნება მკაფიო სიგნალი კრემლისთვის, რომ არავინ გააკეთებს ბიზნესს აგრესორ ქვეყანასთან.
ფორუმი 15-18 ივნისს გაიმართება. იგი ჩაფიქრებული იყო, როგორც "მსოფლიოში წამყვანი პლატფორმა ბიზნეს საზოგადოების წარმომადგენლებს შორის კომუნიკაციისა და ძირითადი ეკონომიკური საკითხების განხილვისთვის".
რუსეთის სახელმწიფო მედია ძალ-ღონეს არ იშურებს იმის "დასამტკიცებლად", რომ თითქოს ყველაფერი რიგზეა და ფორუმი გეგმის მიხედვით ჩატარდება. პროპაგანდისტული მედიის ცნობით, ფორუმში 115 ქვეყნის წარმომადგენელი მიიღებს მონაწილეობას.
"მონაწილეებს შორის არიან არაბეთის გაერთიანებული საამიროების, თურქეთის, ვენესუელას და ეგვიპტის წარმომადგენლები, ასევე, იტალიის, კანადის, აშშ-ის, საფრანგეთის ბიზნესასოციაციების წარმომადგენლები, ჩინეთის, ინდოეთის და კუბის სამეცნიერო და კულტურული საზოგადოების წევრები", - იტყობინება რუსული მედია.
