თურქეთის პრეზიდენტი რეჯებ ტაიპ ერდოღანი აცხადებს, რომ აპირებს კენჭი იყაროს 2023 წელს დაგეგმილ საპრეზიდენტო არჩევნებში.
"ნება მიბოძეთ განვაცხადო, რომ ერდოღანი არის "სახალხო ალიანსის" კანდიდატი", - თქვა მან იზმირში, მმართველი "სამართლიანობისა და განვითარების პარტიის" მხარდამჭერებთან შეხვედრაზე.
"სახალხო ალიანსში" გაერთიანებულნი არიან ერდოღანის "სამართლიანობისა და განვითარების პარტია" და ულტრამემარჯვენა "ნაციონალისტური მოძრაობის პარტია".
თურქული მედიის ცნობით, ოპოზიციურ რესპუბლიკურ სახალხო პარტიას, რომელიც სიდიდით მეორე პარტიაა პარლამენტში, ჯერ არ დაუსახელებია საკუთარი პრეზიდენტობის კანდიდატი.
ერდოღანმა მიმართა ოპოზიციის ლიდერს ქემალ ქილიჯაროღლუს და კანდიდატის დასახელებისკენ მოუწოდა.
"გამოაცხადე შენი კანდიდატურა ან წამოაყენე სხვა კანდიდატურა", - მიმართა ერდოღანმა მთავარ პოლიტიკურ მოქიშპეს.
შეგახსენებთ, თურქეთში საპრეზიდენტიო და საპარლამენტო არჩევნები 2023 წლის 24 ივნისს არის დაგეგმილი.
თურქეთის ყოფილმა პრემიერ-მინისტრმა აჰმედ დავუთოღლუმ განაცხადა, რომ ექვსი ოპოზიციური პარტიის ბლოკი, რომელსაც ის წარმოადგენს, აპირებს საპრეზიდენტო არჩევნებში ერთიანი კანდიდატის წარდგენას.
გამოკითხვების თანახმად, იანვარში ერდოღანის მოწონების რეიტინგი 40.7%-ს შეადგენდა. 54.4% უარყოფითად აფასებდა მის საქმიანობას.
ერდოღანის რეიტინგის კლება დიდწილად უკავშირდება ეკონომიკურ გამოწვევებსა და თურქული ვალუტის კოლაფსს, წლის განმავლობაში ლირის კურსი დაახლოებით 50%-ით დაეცა.
რეჯებ ტაიპ ერდოღანმა პირველად საპრეზიდენტო არჩევნებში 2014 წელს გაიმარჯვა. 2018 წელს კვლავ აირჩიეს სახელმწიფოს მეთაურად. მანამდე, 2003-2014 წლებში მას თურქეთის პრემიერ-მინისტრის თანამდებობა ეკავა.
2023 წლის არჩევნებში გამარჯვების შემთხვევაში, ერდოღანი მესამე ვადით დაიკავებს პრეზიდენტის თანამდებობას.
