აღმოსავლეთ ირანში, თეირანის სამხრეთ-აღმოსავლეთით, ქალაქ ტებესთან, სარკინიგზო ავარიის შედეგად დაიღუპა სულ მცირე 10 ადამიანი, დაშავდა დაახლოებით 50, ხოლო დაშავებულებიდან 16 მძიმე მდგომარეობაშია. იუწყება ირანის სახელმწიფო ტელევიზია.
ზოგიერთი მედიასაშუალების ცნობით, დაღუპულია სულ მცირე 13 ადამიანი. სხვები 17 ადამიანის დაღუპვის თაობაზე იტყობინებიან.
ავარია ღამით მოხდა. წინასწარი მონაცემებით, მატარებელი, რომელშიც 350-მდე მგზავრი იმყოფებოდა, გაურკვეველი მიზეზით ექსკავატორს შეეჯახა. ოთხი ვაგონი რელსებიდან გადავიდა და ამობრუნდა. ხელისუფლება იძიებს, რატომ აღმოჩნდა ექსკავატორი ღამით რკინიგზის ლიანდაგთან ასე ახლოს.
ირანში ყველაზე მასშტაბური სარკინიგზო კატასტროფა 2004 წელს მოხდა, როდესაც საწვავით, სასუქით, გოგირდით და ბამბით დატვირთული მატარებელი რელსებიდან გადავიდა აღმოსავლეთით მდებარე ქალაქ ნიშაბურთან. შედეგად 320 ადამიანი დაიღუპა, 460 კი დაშავდა.
