რუსეთმა შავ ზღვაში მდებარე კუნძულ ზმეინზე საჰაერო თავდაცვის სისტემები განალაგა, - იტყობინება ბრიტანეთის თავდაცვის დეპარტამენტის სამხედრო დაზვერვა.
დაზვერვის ინფორმაციით, კრეისერი "მოსკვას" დაკარგვის შემდეგ, რუსეთის არმიამ კუნძულზე საჰაერო თავდაცვის სისტემები, მათ შორის სარაკეტო სისტემები "Тор" და "Панцирь" გადაიტანა.
"სავარაუდოდ, ამ სისტემების განლაგებით რუსეთი ეცდება, უზრუნველყოს საჰაერო თავდაცვა რუსული ხომალდებისთვის, რომლებიც კუნძულ ზმეინის მახლობლად მოქმედებენ", - აცხადებენ დაზვერვაში.
უწყების ცნობით, რუსული სამხედრო ხომალდების მანევრები კუნძულის სიახლოვეს "ხელს უწყობს" უკრაინული სანაპიროების ბლოკირებას და ხელს უშლის საზღვაო ვაჭრობის აღდგენას, მათ შორის უკრაინული მარცვლეულის ექსპორტს".
უკრაინა და დასავლეთის ქვეყნები რუსეთს უკრაინის პორტებიდან სურსათის ექსპორტის ბლოკირებაში ადანაშაულებენ. მსოფლიოს მრავალი ქვეყანა უკრაინულ მარცვლეულზეა დამოკიდებული, რომლის გარეშეც მათ შიმშილობა ემუქრებათ.
რუსეთი აცხადებს, რომ პორტებიდან ექსპორტის შეფერხება, ერთი მხრივ, უკრაინის ხელისუფლების მიერ შავი ზღვის დანაღვმისა და მეორე მხრივ, საერთაშორისო სანქციების ბრალია.
