რუსული ნავთობის ექსპორტზე შეზღუდვების დაწესების ფონზე, იტალიურმა ნავთობკომპანია Eni SpA-მ და ესპანურმა Repsol SA-მ შესაძლოა, ვენესუელური ნავთობის ევროპაში მიწოდება მომავალ თვეში დაიწყონ. იტყობინება Reuters-ი ინფორმირებულ წყაროებზე დაყრდნობით.
ნავთობის მიწოდება, რომელიც 2 წლის წინ შეწყდა, როდესაც ვაშინგტონმა ვენესუელისთვის დაწესებული სანქციები გაამკაცრა, განხორციელდება კარაკასის დავალიანებისა და ვადაგადაცილებული დივიდენდების სანაცვლოდ.
ერთ-ერთი წყაროს ცნობით, Eni-სა და Repsol-ის მიერ მიწოდებული ნავთობი არ იქნება დიდი ოდენობისა და მსოფლიოს ფასებზე უმნიშვნელო გავლენის მოხდენა შეეძლება.
ამასთან, ვაშინგტონის ნებართვამ, განაახლოს დიდი ხნის განმავლობაში გაყინული ვენესუელური ნავთობის ნაკადები ევროპაში, შესაძლოა, ბიძგი მისცეს პროცესებს ვენესულის პრეზიდენტ ნიკოლას მადუროსა და ოპოზიციას შორის მოლაპარაკებების დაწყებაზე.
ბაიდენის ადმინისტრაცია იმედოვნებს, რომ ვენესუელის ნავთობი დაეხმარება ევროპას რუსეთზე დამოკიდებულების შემცირებაში. მთავარი პირობაა, რომ ნავთობი უნდა წავიდეს ევროპაში, მისი სხვაგან გაყიდვა შეუძლებელია.
ვაშინგტონი მოელის, რომ ვენესუელის უმსხვილესი ნავთობისა და გაზის სახელმწიფო კომპანია (PDVSA) ფინანსურ სარგებელს ვერ მიიღებს ამ უნაღდო ტრანზაქციებიდან.
Reuters-ის ცნობით, ვაშინგტონს მსგავსი გამონაკლისი არ გაუკეთებია ამერიკულ ნავთობკომპანია Chevron-ისთვის, ინდური Oil and Natural Gas-ისთვისა და ფრანგული Maurel & Prom Sa-სთვის, რომლებიც ასევე ითხოვდნენ ნავთობის მიწოდების შესაძლებლობას ვენესუელის მიერ დაგროვილი მილიარდობით ვალის ასანაზღაურებლად.
შეერთებულმა შტატებმა ნავთობის ემბარგო და სხვა სანქციები დააწესა ვენესუელის წინააღმდეგ 2019 წლის მარტში მას შემდეგ, რაც არ აღიარა პრეზიდენტად ნიკოლას მადუროს ხელახალი არჩევა.
ვენესუელა მოკლებულია ნავთობის ლეგალურად გაყიდვის შესაძლებლობას თავის ტრადიციულ ამერიკულ ბაზარზე, რომლის მთლიანმა ექსპორტმა 2019 წელს ქვეყნის ბიუჯეტის შემოსავლის 96% შეადგინა.
