ყაზახეთში რეფერენდუმის მონაწილეებმა დიდი უმრავლესობით მხარი დაუჭირეს საკონსტიტუციო ცვლილებებს, რომლის თანახმადაც, ქვეყანა "სუპერსაპრეზიდენტო რესპუბლიკიდან უნდა გარდაიქმნას საპრეზიდენტო რესპუბლიკად, ძლიერი პარლამენტით".
ყაზახეთის პრეზიდენტის ყასიმ-ჟომართ თოყაევის მიერ შემოთავაზებულ საკონსტიტუციო ცვლილებებს რეფერენდუმში მონაწილე მოქალაქეთა 77.18%-მა დაუჭირა მხარი.
საკონსტიტუციო ცვლილებების წინააღმდეგ 18.66% წავიდა. 5 ივნისს გამართულ რეფერენდუმზე აქტივობამ 68.06% შეადგინა.
საკონსტიტუციო ცვლილებების თანახმად, ქვეყნის პრეზიდენტს აეკრძალება პოლიტიკური პარტიის წევრობა. ამავე დროს სახელმწიფოს მეთაურის უახლოეს ნათესავებს არ ექნებათ უფლება, დაიკავონ ხელმძღვანელი თანამდებობები საჯარო სექტორში.
ამავდროულად, ყაზახეთის პირველი პრეზიდენტის, ნურსულთან ნაზარბაევის "ელბასის" (ერის მამის) კონსტიტუციური სტატუსი უქმდება.
ცვლილებები ასევე ითვალისწინებს ადამიანის უფლებების სფეროში არსებული ვითარების ინსტიტუციურ გაუმჯობესებას. გათვალისწინებულია ადამიანის უფლებათა კომისრის თანამდებობის შემოღება, სიკვდილით დასჯის სრული აკრძალვა და საკონსტიტუციო სასამართლოს ფორმირება.
ყაზახეთის პრეზიდენტი თოყაევი საკონსტიტუციო რეფორმის ინიციტივით მიმდინარე წლის იანვარში მომხდარი სისხლიანი არეულობის შემდეგ გამოვიდა. ქვეყანაში წესრიგის აღდგენის ფონზე, თოყაევმა ნაზარბაევს და მის ახლობლებს გავლენიანი სამთავრობო თანამდებობები ჩამოართვა.
ექსპერტები თვლიან, რომ საკონსტიტუციო რეფორმის წარდგენით, თოყაევი მეორე საპრეზიდენტო ვადისთვის ემზადება.
