ბალტიის ზღვაში დაიწყო ნატოს ფართომასშტაბიანი სამხედრო წვრთნები - Baltops.
ყოველწლიური სწავლება 5 ივნისს დაიწყო და თითქმის ორი კვირის განმავლობაში გაგრძელდება.
წვრთნების მიზანია ბალტიის ზღვის შესაძლო ბლოკადაზე რეაგირების სისწრაფის შემოწმება და ნავიგაციის თავისუფლების უზრუნველსაყოფად ქმედებების შემუშავება.
სამხედრო მანევრების ორგანიზატორი აშშ-ს საზღვაო ძალებია. სამხედრო მანევრებში მონაწილეობას მიიღებს 45 ხომალდი, 75 თვითმფრინავი და 7000-ზე მეტი სამხედრო მოსამსახურე 16 ქვეყნიდან. მათგან 14 ჩრდილოატლანტიკური ალიანსის წევრია.
წვრთნებში მონაწილეობას მიიღებენ ფინეთი და შვედეთი, რომლებმაც 18 მაისს ნატოში გაწევრიანების განაცხადი წარადგინეს.
Baltops-ი 50 წელია ბალტიის ზღვაში ტარდება, პირველად ის 1972 წელს ჩატარდა.
