დღეს დილიდან, ბორჯომის ორი ჩამომსხმელი ქარხნის 400-მდე თანამშრომელმა უვადო გაფიცვა გამოაცხადა.
გაფიცული თანამშრომლები აცხადებენ, რომ სამუშაო ადგილებს იქამდე არ დაუბრუნდებიან, სანამ მათი მოთხოვნები არ დაკმაყოფილდება.
მათ უფლებებს საქართველოს აგრარულ მეურნეობაში, ვაჭრობასა და მრეწველობაში დასაქმებულთა პროფკავშირები "ლაბორი" იცავს.
"ბორჯომის" თანამშრომლები აცხადებენ, მათ რამდენიმე მოთხოვნა აქვთ:
უკანონოდ გათავისუფლებული 50 ადამიანის დაუყოვნებლივ სამსახურში აღდგენა;
ხელფასების დარიცხვა;
ძველ შრომით პირობებზე დაბრუნება;
უვადო ხელშეკრულებები ყველა დასაქმებულისთვის და ხელფასების 25 პროცენტით ზრდა;
შანტაჟის, მუქარისა და იძულების ფაქტების აღმოფხვრა, ხოლო მასში მონაწილე ადმინისტრაციის ცალკეული პირების სამსახურიდან გათავისუფლება და პასუხისგებაში მიცემა;
კოლექტიური შეთანხმების გაფორმება.
თანამშრომელთა გაფიცვას გამოეხმაურა "ბორჯომის" ჩამომსხმელი N1 ქარხნის დირექტორი მერაბ ახმეტელი.
საზოგადოებრივი მაუწყებლის ცნობით, მერაბ ახმეტელი აცხადებს, რომ არსებული კრიზისის გათვალისწინებით, ხელფასების 25%-იან ზრდაზე საუბარი, არარეალური მოთხოვნა და მიზანმიმართული მცდელობაა, რომ დაზიანდეს ისედაც მინიმუმამდე დაყვანილი წარმოების პროცესი.
მისივე თქმით, დღევანდელ გაფიცვაში მონაწილეობს თანამშრომლების მხოლოდ ნაწილი.
შეგახსენებთ, 29 აპრილს, რუსეთისთვის დაწესებული სანქციების გამო, "ბორჯომის" ჩამომსხმელმა ორივე ქარხანამ დროებით შეაჩერა მუშაობა. "ბორჯომის" საკონტროლო პაკეტს 2013 წლიდან ფლობს Alfa Group-ი, რომლის დამფუძნებელი სანქცირებული რუსი მილიარდერი, ბიზნესმენი მიხაილ ფრიდმანია.
5 მაისს "ბორჯომმა" 49 თანამშრომელი გაათავისუფლა.
