რუსეთის ყოფილი პრეზიდენტის ბორის ელცინის სიძე, ვალენტინ იუმაშევი, პუტინის მრჩევლის თანამდებობიდან გადადგა. იტყობინება Reuters-ი ორ წყაროზე დაყრდნობით.
იუმაშევის გადადგომა დაადასტურა ლუდმილა ტელენმა, ბორის ელცინის საპრეზიდენტო ცენტრის ფონდის აღმასრულებელი დირექტორის პირველმა მოადგილემ, რომლის სამეურვეო საბჭოშიც შედის ვალენტინ იუმაშევი.
Reuters-ის სხვა წყაროს ცნობით, იუმაშევმა კრემლი აპრილში დატოვა. გამოცემა ეცადა კომენტარების მიღებას თავად იუმაშევისა და კრემლის პრესსპიკერ დმიტრი პესკოვისგან, თუმცა ვერ შეძლო.
"იუმაშევი იყო მრჩეველი, რომელსაც შეზღუდული გავლენა ჰქონდა პუტინის გადაწყვეტილებზე, მაგრამ მისი წასვლა გაწყვეტს პუტინის ადმინისტრაციის ერთ-ერთ უკანასკნელ კავშირს ელცინის ეპოქასთან, ლიბერალური რეფორმების პერიოდსა და დასავლეთთან რუსეთის ღიაობასთან", - წერს Reuters-ი.
ელცინის ეპოქის კიდევ ერთმა მაღალჩინოსანმა, ანატოლი ჩუბაისმა, მარტში, უკრაინაში რუსეთის შეჭრის დაწყებიდან მალევე, დატოვა პრეზიდენტის სპეციალური წარმომადგენლის პოსტი მდგრადი განვითარებისა და საერთაშორისო ორგანიზაციებთან ურთიერთობის საკითხებში და რუსეთიდან წავიდა.
ელცინის მმართველობის დროს ვალენტინ იუმაშევი პრეზიდენტის ახლო წრეში იყო, 1997-1998 წლებში მსახურობდა მისი ადმინისტრაციის უფროსად და დაქორწინებული იყო ელცინის ქალიშვილ ტატიანაზე.
ის ფაქტი, რომ ვალენტინ იმუშაევი პუტინის მრჩევლის თანამდებობას იკავებდა, 2018 წლის ივნისში გახდა ცნობილი. ამის შემდეგ კრემლის პრესსპიკერმა დმიტრი პესკოვმა განმარტა, რომ იუმაშევი ამ თანამდებობაზე 18 წელი მუშაობდა.
